Мялум вуйиганси, РД-йин Халкьдин Собраниейин аьхиримжи сессияйиз уч духьнайи депутатари, июлин 1-пи йигълан тина, Дагъустандин аьтрафариин «Пишекарвалин гъазанждилан алдабгъру налог» – хусуси метлеб айи налогарин къайда кьувватнаъ ипбан гьякьнаан» къанун кьабул гъапIну. Къанундин проектдиз асас вуди, дилаварчивал апIурайи агьалйириз, чпин ляхин рягьят шартIариъ гъабхуз ва жвуван гъазанжар къанундихъди асас вуйидар хьуз мумкинвал тувра.
Му месэлайин гьякьнаан газат урхурайидар гъаврикк ккаъбан бадали, учу Дагъустандин Халкьдин Собраниейин къанунчивалин, къанун тамам, гьюкумат тикмиш апIбан ва ерли самоуправлениейин Комитетдин председатель Алавудин Мирзабалаевдихьна илтIикIунча ва цIийи къанундин мяна ачухъ апIуб ккун гъапIунча.
Алавудин Мирзабалаевдин гафариинди, Урусатдин хайлин субъектариз чпин регионариъ ухдитIан му къанун кьабул апIуз ккунди айи, амма, федералин къанундиинди думу ляхин апIуз анжагъ гъябгъюрайи йисан 1-пи июлихъантIан ихтияр адар.
«Му къанун кьабул апIбан асас метлеб, кIул’инди вуйи дилаварчйириз кюмек апIуб ву. 2019-пи йисан 1-пи январиантIан Урусатдин 4 региондиъ эксперимент жюрейиинди къанун кьувватнаъ ипнийи. Цци 1-пи январихъан 20-сан региондиъ думу кьабул гъапIну, хъа имбуну регионариз анжагъ июлихъантIан ихтияр тувундар. Жараси кIури гъабхьиш, къанун кьабул апIбиинди, гьамус кIул’инди вуйи дилаварчйириз пенсионный фонднак ва яшайиш’валин страхованиейик киврайи пул сарун кидривуз мумкинвал а, ва дурарихьан жвуву жвув ляхнихъди тямин апIру къайдайиина улдучIвуз шулу. Гьацира, бухгалтерияйин учет гъабхуз ва кассайин аппаратар дивуз сарун гереквал гъубзидар. Янаки, къанундихьна наразивал улупуз гъич саб далилра адар»,
– къайд гъапIну депутатди.
Дупну ккундуки, гьамусяаьт кIул’инди вуйи дилаварчйири йисандин арайиъ страхованиейин ва пенсионный фондназ 25-37 агъзур манат тувра. Къанун кьабул гъапIхъан тина му кьадарнаъди пул тувуб лазим хьибдар.
Къайд апIуб лазим вуки, пишекарвалин гъазанждилан бисру налогдин 63% республикайин бюджетдиз гъябгъиди, хъа имбуну 37% – медицинайин мажбури страхованиейин фондназ.
Аьхириъ Алавудин Мирзабалаевди мялум гъапIганси, налог тувбан цIийи къайдайиъ учIвбан бадали, кIул’инди вуйи дилаварчйирин гъазанжар йисандин арайиъ 2 миллионна 400 агъзур, хъа вазлин арайиъ 200 агъзур манаттIан артухъ вуди ккундар. Аькси дюшюшнаъ дугъу улихьгандин саягъниинди налог тувувал лазим хьибди.
