Урусатдин Президент Владимир Путинди оборонайин министр Сергей Шойгуйиз Гъалибвалин 75 йис тамам хьпан парад июндин 24-пи йигъан гъабхуз гьязур хьувалин гьякьнаан амур гъапIну. Дугъан гафариинди, COVID-19 коронавирусдин эпидемияйин варитIан гъагъи вахт улдубчIвну. Президентди гъапиганси, параддин иштиракчйирин сагъламвализ зарар шлу ляхнар шлубкьан цIиб, хъа бегьемди уьмриан терг гъапIиш, лапра ужу хьибди.
«Урусатдин меркез Москвайиъ ва жара шагьрариъ Ватандин Аьхю дявдиъ Гъалибвал гъадабгъну 75 йис тамам хьпаз бахш дапIнайи дявдин параддиз гьязур хьувал ккебгъуз амур апIураза. Ухьу Парад 1945-пи йисан, Москвайин Уьру майдандилан тина Москвайин багахь женгар гъуху, Ленинград гъюбхю ва Сталинград азад апIури женгар гъуху, Европа азад гъапIу, Берлин чпин хилиз гъибису эскрар иштирак гъахьи тарихи парад гъубшу июндин 24-пи йигъан гъабхидихьа»
– къайд гъапIну Владимир Путинди Сергей Шойгуйихъди вуйи совещаниейиъ.
Майин 9-пи йигъан Александровдин багъдиъ, мялул дару Эскрин накьвдихъ Владимир Путинди гъалибвалин йигъкан вуйи чан фикрар гъапнийи. Думуган уьлкейин Президентди гьарган убгурайи цIихъ парад ва «Аьжалсуз полк» марш гъабхуз гаф тувнийи.
«Аьжалсуз полкнан» марш июлин 26-пи йигъан кIули гъябгъиди. Президентдин гафариинди, думу серенжемдиъ инсанарин арайиъ лазим кьадар манзил уьбхюз лап читинди ву. «Аьгьвалат фициб шулуш лап дикъатниинди лигидихьа, багахь вазари арайиз гъюз мумкин вуйи читинвалар гьисабназ гъадагъидихьа. Хъа эгер, пишекрарин фикриинди, хатIасузвал тямин апIуз даршлуси гъабхьиш, «Аьжалсуз полкнан» марш тешкил апIувал кьанди вуйи жара вахтназ илдипидихьа»,
– давам гъапIну Владимир Путинди.
КIваина хурача, гьаму йисан уьлкейиъ коронавирусдихъди гъагъи аьгьвалат дубхьнайивализ дилигну, майин 9-пи йигъан Гъалибвалин парад гъабхьундайи ва уьлкейин агьалйириз мици хьуваликан хайлин дердра гъабхьнийи. Думуган Президентди юбилейин йигъ жара вахтнаъ яркьуди къайд апIуз гаф тувнийи. Гъалибвалин йигъан меркездин завариз дявдин самолетар удучIвнийи, Нева нирин аьтрафариина Балтийский флотдин дявдин юкьуб гими гъафнийи. Йишвну Москвайиъ Аьхю Гъалибвалин 75 йис тамам хьпаз бахш вуди салютар деетнийи.
