Июндин 2-пи йигъан гвачIниндиз вуйи улупбариинди, Урусатдин Пенсйирин фондну 3 йислан 16 йис’инакьан тамам дубхьнайи 18 миллионтIан артухъ бицIидариз саб ражари тувру 10 агъзур манат тувбан гьякьнаан 13 миллионтIан артухъ хизанариан аьрзйир кьабул гъапIну. Аьхюну пай аьрзйир тасдикь дапIна, 1-пи июндихъан абйир-бабариз пул гъюз хъюбгъну.

Гьамусяаьт кьувватнаъ айи къайдайиз асас вуди, аьрзйир ляхин апIру хьуд йигъандин арайиъ гьял апIуру, шубуд йигъандин арайиъ пулин дакьатар хътауру.

Эгер аьрза тувну 8 йигъ улдубчIвбан кьяляхъ хизандиз пулин дакьатар дарфиш, абйир-бабарихьан, бицIидариз саб ражари тувру пулин дакьатарин гьякьнаан суалариз жавабар тувбан бадали, хусуси метлеб ади тартиб дапIнайи Урусатдин Пенсйирин фонднан online.pfrf.ru электрондин сервисдиз аьрза хьади илтIикIуз шулу. Сервисдиз илтIикIбан бадали, Госуслугйирин Порталиъ регистрация апIувал лазим дар.