Вари Урусат карантиндиъ ади хьадукран вазар душну, магьа хьадан сабпи вазра улубкьну. Аьзарлу шулайидарин кьадар сацIиб яваш хьуз хъюбгънашра, гьеле му уьзри беден зяиф апIурайи инсанар йигъан швнур-сар ашкар шули ими. Гъийин йиз сюгьбатчи – ихь ватанагьли, Санкт-Петербург шагьриъ яшамиш шулайи ва думу шагьрин Александровский больницайиъ медсестради лихурайи Маисат Митарова ву.
Маисат Митарова, кьюд йис мидиз улихьна Дагъустандиз гъафир, багъри газатдин редакцияйизра хялиш гъахьнийи. Думуган учу дугъкан макьалара гъибикIнийча, ва инстаграмдин прямой эфириз гъилигу хайлин ватандашарин Маисатдин кIваз хушлу сурат, рягьимлу хасият кIваиндира илмишул. Гъи дугъу гъабхурайи баркаллу ляхникан дибрикIди гъузуз амур гъапIундайзуз.
Маисат Александровский больницайиъ хирургияйин отделениейиъ лихури 27 йис шула. Му муддатнаъ дугъаз ляхниъ ццийин йисандин тIягъюнсиб бедбахтвал гьябкъюб дар.
«Коронавирус Урусатдиъ ачмиш гъабхьи йигъарилан башламиш дапIну, ич больница думу вирусдиан аьзарлу гъахьидар ккаъру инфекционный аьхю больницайиз илтIибкIну. ИкибаштIан, узу улихьди гьабхурайи ляхин гизаф дигиш гъабхьну. Узу имиди гъубзри, кIулди больницйири ляхин апIбан саягъ гьюдюхну. Бязи больницйир, гьадму гьисабнаан ичубра, анжагъ коронавирус уьзур кайи аьазарлуйиризтIан лигурадар. Яна, тяди кюмекнан медицинайин машиндиъди учухьна гъахи иццрур сифтена-сифте тест гъадабгъбан къайдайиинди аьзарлу духьнаш, ашкар апIурача. Анализарин жавабар гъюбан къяляхъ, думу «уьру зонайизди» гъахуру. ТIягъюн ачмиш дубхьну амиди учуз ич сагъ’вал хатIалу вирусдихьан уьрхру палат адайчуз.
Ич больницайин хайлин духтрар ва медсестрйир му вирусдиан аьзарлу гъахьну. Думуган больница хъябкьнийи, аьхюнуб пай медперсонал карантиндиз хулариз гьаънийи. Апрелин 27-пи йигъан больницайиз лап гъагъи гьялнаъ ади сар аьзарлу гъахну. Думу йигъан дежурствойиъ айза. Узу йиз ляхнин вазифйир тамам апIури, думу касдизра лигури гъахьунза. Кьюд йигълан йиз температура за хьуз, мухриан нефес гъагъиди гъюз, дих лал хьуз хъюгънийи. ВуйиштIан, думу касдикан уьзур узукна тарабгъну. Анализарира узук вирус кайивал тасдикь гъапIнийи. Му уьзри узуз таниш вуйи, узухъди сатIиди лихурайи нейрохирургияйин отделениейин заведющий Филатов, УЗИ апIру духтир, реаниматолог духтир, сар медсестра уьмрихьан гъапIну. Хайлин духтрарик ва медсестрйирик гучI кабхъну. Узу, уьзур гъагъи гьялназ илтIибкIну, кьюб-шубуб гьяфтайиъ больничныйдиъ гъахьнийза. Гьамусяаьт больницайиъ «уьру зонайиъ» лихураза. Йиз ляхин узуз гизаф ккундузуз ва узкан кюмек ккунидарихьна аьхю гьюрматниинди илтIикIураза. Гьамусяаьт учу машниин алабхьурайи маска кIалибсузуб, машназ ва нефес хътабгъуз гьиидарвал хруб ву. Хъа гьаци вушра учу думу илдидибтри алабхьну, жвув шлубкьан уьзрихьан уьрхюз рякъ абгурача«,
– ктибура Маисат Рамазановнайи.
Гьаму вахтнан арайиъ варитIан гьагъи йигъ фунуб гьабхьнийвуз, кIуру йиз суалназ, дугъу гьарсаб йигъ гьагъиб вуйзуз, жаваб тувнийи.
«COVID-19 уьзур кайи жигьилар гъагъи гьялнаъ ади рякъруган, кIваз гуж шулиз. Учу, медикар, варибдихьна вердиш духьнача. Хъа вушра му уьзри гьиссар жигьатнаанра инсандиз аьхю тясир апIуру. ТIягъюн ачмиш дубхьнайи садпи йигъари учу ковид уьзур кайидар кьабул апIуз отделенйир гьязур апIурайча. Учухьна 70 йис яш айи кас гъахну. Дугъан уьмрин юлдшинра гьадмукьан йисар вуйи. Чпин уьмур дурари сатIиди хъапIну. Ва 20 йигъаз жилир ич больницайиъ ккаиган, дурар чпин уьмриъ сабпи ражари жара гъахьну. Чиб-чпиз дурар сану гъяркъюндар»,
– ктибтура медсестрайи.
Маисат Митаровайи ватандашариз, ихь вари жигьилариз, яш дубхьнайидариз гьамцдар теклифар тувнийи: гизаф инсанар уч шлу йишварихьан ярхла гъузуб, кючейиз удучIвруган машниин маска ва хилариин бегьлийир алахьуб, кми-кмиди хилар жикIуб, марццишин уьбхюб, эгер аьзарлу гъахьиш, духтриз дих дапIну, дугъу гъапи сагъ’валин курс къайдайиинди гъабхуб.
