Наркомания – аьхир адру завал

 

Инсаниятдин аргъаж’вализ, жигьиларин артмиш’вализ жюрбежюр рякъяр ачухъ вуйи гъийин девриъ, гьяйифки, улупнайи ужувлан дигиш’валариз къаршу вуди тялукь серенжемар гъахбаз манигъ’вал апIурайи учIру месэлйирра хайлин гъузра.

 

Деврин бедбахтваларин арайиъ наркоманияйин месэлайи «такабур» йишв дибисна. ХХI аьсрин му уьзри, вари уьлкейиъси, Хив райондиъра агьалйирин сагъламвал зяиф апIбаз тясир тувра. Му «тIягъвнин» натижайиъ хизанар даргъбан, яшайишдин жара тахсиркарваларин кьадар артухъ хьпан дюшюшарра арайиз гъюра.

Хъа му зегьер ишлетмиш апIури, думу тарабгъбан гъаразнаъ айидарин милли рюгьлувалин, эдеблувалин дережайикан гьич улхубра лазим шуладар.

Хив райондин айтIан ляхнариз лигру отделин гъуллугъчйири, тахсиркарвалар кам апIбан шилнаъди, сикин дарди наркоманияйиз аькси серенжемар тешкил апIура, вушра гьякьикьатдиъ гьелелиг я дурар чпи, я жямяаьтлугъ сагъу кьувватар архаин апIурадар.

Арайиз гъюрайи саб жерге дюшюшари дагълу гъулариъра наркотикар ишлетмиш апIуз, думу «агъу» тарабгъуз ккунидар гъузрайивал субут апIура.

– Тахсиркарвалин шилнаъ айи саб жерге ватандашар, арайиз гъюрайи аьгьвалатну къайд апIурайиганси, фукьан жаза ижми гъапIишра, думу рякъхьан ярхла хьуз гьялак шуладар. Узу кьатI’иди наркоманарикан, наркотикар гьясил ва масу тувбан гъаразнаъ айи касарикан улхураза.

Гъябгъюрайи йисан эвелариан башламиш дапIну, улупнайи вахтназ полицияйин гъуллугъчйири райондин аьт-рафариин гъуху серенжемарин натижайиъ наркотикарихъди аьлакьаллу саб жерге тахсиркарваларра ашкар апIру мумкинвал гъабхьну. Гьаци, 17-пи январиъ райцентриъ З. гъулан агьали 0,6 гр. кьадарнаъди «Трамал» СДВ масу туври гъидисну. Тахсиркрин гьякьнаан, РФ-дин УК-йин 234-пи маддайин 1-пи пайназ асас вуди, уголовный дело гъитIибккна.

Кьяляхънаси райондин кьюбсана гъулаъ гъуху ахтармишарин натижайиъ хусуси хулариъ къанунсузди уьбхюрайи марихуана гъибихъну. Тахсиркрари, къанундиз асас вуди, жаза зигиди.

Гьамусяаьтна, 26-пи майилан башламиш дапIну, райондин сяргьятариин «МАК-2020» метлеблу операция кIули гъябгъюра. Дидин дахилнаъди полицияйин вакилари кьабул апIурайи саб жерге уьлчмйир йишвариин къанунсузди битмиш апIурайи, наркотик кайи саб жерге набататар дурзнайи йишвар ашкар, дурар терг апIбаз, улупнайи къанунсуз гьяракатариин машгъул вуйи касар мялум дапIну, дурар жавабдарвалихъна зигбаз, наркотикар тарагъбаз рякъяр хъяркьбаз, наркотикар ишлетмиш апIбахьна, дурар тарагъбахьна жалб апIурайи себебар ашкар апIбаз сарф дапIна.

Пуз ккундузуз, жямяаьтлугъдин сагъу гъатари агьал-йирин, асас вуди жигьиларин, арайиъ наркоманияйин хатIалувалин, къурхулувалин гъаврикк ккаъбан ляхин гъабхбаъ аьхю мяна ва кьувват а. Мушваъ гьарсар ватандаш жавабдарвалиинди янашмиш хьувал чарасуз ву.

Фицики наркотикарин асиллувалиъ ахъу живанарин гележег фициб шулаш, гъи саризра жиниб дар, – аьлава гъапIну Хив ОМВД-йин УР-дин НОН-дин жавабдар гъуллугъчи Аьлипулат Хидировди.