Июндин 8-пи йигъан уьлкейиъ агьалйирин яшайишдин игьтияжар гьуркIру гъуллугъчийин Йигъ къайд гъапIну. Му йигъ улубкьайиз улихьна учу Хив райондин УСЗН-дин кIулиъ айи Рафидин Юсуфовдихъди телефондиан сюгьбат гъубхнийча. Яшайишдин игьтияжар гьуркIру цирклин вари идарйирин вакилар пишекарвалин йигъахъди тебрик апIбалан кьяляхъ, дугъу багарихьди РФ-дин Конституцияйиъ тIаърайи цIийи дигиш’валарин гьякьнаан чан фикрар ачухъ гъапIнийи.
«Гъи ихь ватандашар коронавирусдин тIягъвнихъди аьлакьалуди хулариъ гъузуз мажбур духьнайи вахтна, яшайишдин игьтияжар гьуркIру идарйирин вакилари гъабхурайи ляхнин важиблувал хъана за гъабхьну. Уьмрин гъагъи аьгьвалатнаъ ахьнайи хизанарихьна кюмек хьади сарпидарди социалин цирклин гъуллугъчйир хъуркьра. Ич вакилари агьалйириз вахтниинди дармнар ва итIру сурсатар масу гъадагъуз, агьли касариз чарасуз лазим вуйи сабпи кюмек тувуз ва жара игьтияжар гьуркIуз кюмек апIура. Хив райондин агьал-йирин яшайишдин ихтияжар гьуркIру управлениейиъ 16 вакил лихура. Узуз дурар ва гьаму цирклин жара идарйирин вари гъуллугъчйир пишекарвалин йигъахъди тебрик апIуз ккундузуз. Учву зигурайи зегьметниинди дюн’яйиъ уж’вал, рягьимлувал, гъайгъударвал тарабгъурачва. Кюмекназ ккилигурайи гьарсар касдин машнаъ шаду инчI хьувал – му ичв ляхнин хъуркьувал ва натижа ву. Ичв баркаллу зегьметназ чухсагъул!» – гъапнийи Рафидин Юсуфовди.
РФ-дин Конституцияйин бязи маддйир дюз алаувалихъди аьлакьалу вуди чан фикрар ачухъ апIури, Рафидин Юсуфовди къайд гъапIганси, думу дигиш’валари Урусатдин Федерацияйин асас къанундиъ уьлкейин ватандашариз яшайишдинна экономикайин цирклариан вуйи чпин ихтиярар тамам апIбан заминвалар мюгькам апIиди.
«РФ-дин Президентди Конституцияйиъ тIауз тек-лиф гъапIу жягьтлувалари Урусатдин вари агьалйирин яшайишдин цирклиан ихтиярарин мюгькамвал яратмиш апIбаз кьувват хьибди, уьлке мублагъ апIуз, уьмрин гъагъи гьялнаъ айи, кюмекназ ккилигурайи хизанарин яша-йишдин дережа за апIуз пулин дакьатарин кюмек тувди. Йиз фикриан, багахь гележегдиъ думу дигиш’валарин шагьидар хьидихьа. Хив райондиъра касиб хизанар гизаф а. Яшамиш хьпан бадали, чарасуз лазим вуйи пулин кьадар за, пенсйирин индексация, яшайишдин жюрбежюр пособйирин кьадар артухъ апIувал, гьелбетда, дицисдар хизанариз кюмек ву. Яшайишдин цирклиан агьалйирин ихтиярар уьрхбаъ Конституцияйин мюгькам заминвал айивали важиблу месэлйир рягьятди гьял апIуз мумкинвал тувди», – къайд гъапIнийи йиз сюгьбатчийи.
Рафидин Юсуфовди Хив райондин вари жямяаьтдиз, Конституцияйиъ дигиш’валар тIаъбан бадали, чпин сесер тувуз гъювалин теклиф гъапIну.
КIваин апIуз ккундучуз, РФ-дин Конституцияйиъ тIаърайи дигиш’валарин гьякьнаан вари Урусатдин сесер тувру йигъ 1-пи июлиз дивна.
