Гюльнара Мягьямедова

 
Мягьячгъалайин шагьрин администрацияйин культурайин управлениейи Урусатдин халкьарин бабан чIаларин йигъаз бахш вуди «Бабан чIал – ихь булагъ ву» кIуру проект гьязур дапIна.

 

Шагьрин администрацияйин культурайин идарайи гьязур дапIнайи проект гизаф миллетарикан арайиз дуфнайи Дагъустандин халкьарин бабан чIалар, культурайин ирс уьбхбак ва ад за апIбак лайикьлу пай киврайи саб пай ву.
Думу проектдин бицIи иштиракчйири Дагъустандин машгьур шаир Расул Гьямзатовдин «Къарнйир» кIуру шиир Дагъустандин халкьарин 14 чIалниинди урхиди. Проектди, бицIидариз чIал аьгъювал улупруси, думу ихь региондиъ сабвалин ва культурйирин жюрбежюрвалин лишанра хьибди.

 
Шиърар урхбалан савайи бицIидари бабан чIалнан мянайикан ва думу уьбхбан важиблуваликан суалариз жавабар тувди.
Мягьячгъалайин администрацияйин культурайин управлениейин начальник Фарид Абалаевди къайд гъапIганси, думу проект Урусатдин халкьарин сабвалин йисан дахилнаъди тешкил дапIнайиб ву. «Учу бабан чIалниинди, культурайиинди дамагъ апIурайи бицIидариз удучIну улхуз мумкинвал туврача. Аргъаж шулайи наслариз бабан чIалнан кьимат аьгъяди хьуб, гележегдин наслариз думу уьбхбан мяна аьгъю апIуб важиблу ву», – гъапнийи дугъу.

 
Проект 1-пи сентябрилан Урусатдин Федерацияйин халкьарин бабан чIаларин йигъ къайд апIру 8-пи сентябризкьан гьяракатнаъ хьибди.
Видеороликар Мягьячгъалайин администрацияйин асас машариъ, социальный сетариъ, «Дагъустан» РГВК-йин, «Дагъустан» ГТРК-йин каналариан улупиди. Агьалйирихьан бицIидарин яратмишарихъди таниш хьуз ва бабан чIалниинди шиир урхуз кюмек апIуз шулу.