Наргиз Гюлечова


 
Гьар йисан 26-пи июли Дагъустандиъ республикайин Конституцияйин Йигъ къайд апIура. Гьарганси ццира, му йигъахъди аьлакьалу вуди, вари муниципалитетариъ шадлугънан серенжемар кIули гъушну.


Дагъустандин меркездиъ кули гъушу серенжемариъ региондин Главайин вазифйир вахтназди тамам апIурайи Федор Шукинди ляхниъ ужудар хъуркьувалар улупу дагъустанлуйириз, гьадму гьисабнаъди духтрариз, мялимариз, культурайин гъуллугъчйириз, дявдин эскрариз, гизаф веледар айи дадйириз гьюкуматдин ва муниципалин терефнаан вуйи пешкешар тувну.
Му машквраз бахш вуйи асас серенжемар «Урусат – Йиз тарих» тарихнан паркдиъ кIули гъушну. Му йигъахъди тебрик апIури, уч духьнайидариз Федор Шукинди гьамци гъапнийи: «Конституция кьабул апIуб гьаму заманайин Дагъустандин тарихдиъ варитIан асас гьядиса гъабхьну. Эвелиан республикайин Конституция 1994-пи йисан 26-пи июли кьабул гъапIнийи, хъа 2003-пи йисан 10-пи июли цIийи редакция кьабул гъапIнушра, му машквран йигъ 26-пи июль вуди гъибтну, ва гъийин йигъаз му республика артмиш апIурайи къанундин мюгькам диб ву.

 
Дагъустандин Конституцияйин кучIвбан пайнак дидикIнайи гафар – «Ухьу тарихдиинди саб гьюкуматдиз дахил шулайи, Урусат Федерацияйик кахьрайи Дагъустандин Республикайин гизаф миллетарин халкьар вухьа…», гьаму гафариъ, ихь варитIан асас кьиматлувалин хасият - сабвал, сарсарихьна гьюрмат айивал, Ватандин кьисматнахъан вуйи жавабдарвал ва ислягьвалиинди яшамиш хьувал – атIагна», – гъапну региондин кIулиъ айири.

 
Дагъустандин Конституцияйин йигъахъди аьлакьалу вуди, гъуллугънаъ ужудар хъуркьувалар улупу хусуси метлеб айи дявдин операцияйин иштиракчйириз гьюкуматдин пешкешар туврайи серенжемдиъ «Жвув уьрхяй, учву Гъалибвал хьади гъюбаз ккилигурача» кIури, Федор Щукин уч духьнайидарихьна илтIикIнийи. Дугъу эскервалин гъуллугъ тамам апIурайидариз ва ихтиярар уьрхру органарин вакилариз пешкешар тувну. «Хусуси метлеб айи дявдин операцияйин иштиракчйири, аргъаж шулайи наслар кьувватлу ва сариканра асиллу дару Урусатдиъ яшамиш хьпан бадали, ихь Ватандин хатIасузвал, дидин суверенитет уьбхюра. Учву, хусуси метлеб айи дявдин операцияйин вари иштиракчйир, гъийин му машкрахъди тебрик апIураза», – гъапну Федор Щукинди.
Главайин вазифйир вахтназди тамам апIурайири гьюкуматдин пешкешар Каспийский флотилияйин эскраризра тувнийи. «Гъи ухьу Дагъустандин Конституцияйин йигъси, Урусатдин гьюлерин дявдин флотдин 330-пи йисра къаршуламиш апIурахьа. Гьарсаб вахтна гьюлериин али эскрар, ихь Ватандин милли маракьар уьбхбан бадали, мюгькамди гъаравлиъ а. Мюгькам гъаравлин ляхин гьюлериин али эскрари гъира эдеблуди давам апIура», – гъапнийи Федор Щукинди.

 
Му йигъан республикайин яшайишдин жа-жара циркларин гъуллугъчйиризра гьюкуматдин пешкешар тувну.
«Учву гьар йигъан инсанарин сагъламвал уьбхюри, дурар аьжаликкан ккадагъурачва. Жандилан хил алдабгъну, заан пишекарвалиинди зигурайи ичв зегьметназ чухсагъул!» – гъапну Федор Щукинди, сагъламвалин пишекрарихьинди илтIикну.
Мялимар ва культурайин гъуллугъчйир машкврахъди тебрик апIури, региондин Главайин вазифйир вахтназди тамам апIурайири дурари республика ва уьлке артмиш апIбан ляхник, милли халкьарин гизаф жюрбежюрвалар уьрхбак киврайи пайнаканра гъапну.
«Ихь мялимариз лап марцци кIваан чухсагъул кIураза! Аргъаж шулайи дагъустанлуйир эдеблувалиинди, Ватандихьна, зегьметнахьна ккунивал ади тербияламиш апIурайидар учву вучва. Республикайинси, уьлкейинра гележег учву зигурайи зегьметналан асиллу ву.

 
ИкибаштIан, наслар сар-сарихъди сатIи апIбаъ, культурайира асас йишв бисура. Гъи культурайин гъуллугъчйири, сабдизра барабарвал адру республикайин халкьарин иср артмиш апIури, думу уьбхюра ва аьсрариинди вуйи аькьвлинна рюгьнан аьдатар мюгькам апIура. Учву вари сатIи апIурайиб халкь, жямяаьтлугъ ва республика бадали гъабхурайи ичв гъуллугъ ву», – аьлава гъапIну серенжемдиъ Федор Щукинди.


Гьадму йигъан хябяхъган Дагъустандин Конституцияйин машквраз бахш вуйи ва республикайин культурайин министерствойи тешкил дапIнайии шадлугънан ярку мярака, Дагъустандин гьюкуматдин урус театрин улихь давам гъабхьну. Душваъ республикайин улихь-кIулихь хьайидар, машгьур артистар иштирак гъахьнийи. Мяракайиз лигуз мина 6 агъзуртIан артухъ агьалйир уч гъахьнийи. Концерт ккудубкIбалан кьяляхъ республикайин Конституцияйин машквран йигъ фейерверкар деетбиинди аьхирихъна гъафну.