Наргиз Гюлечова
Дагъустандин экономикайинна аьтрафарин артмиш’валин министерствойин пресс-гъуллугънаан тувнайи мялуматариинди, гъюру йисаз «Ерли жягьтлувалар» проектдиъ иштирак хьуз ккунидарихьан конкурсдиз аьрзйир кьабул апIуз хъюгъна.

«Ерли жягьтлувалар» проект Дагъустандиъ 2016-пи йисхъанмина уьмриз кечирмиш апIура ва гъийин йигъаз саки вари муниципалитетариан душваъ чпин проектар хьади агьалйир иштирак духьна.
Дупну ккундуки, му проект юрутмиш апIбан варитIан асас метлеб ерли самоуправлениейин органариз ва жямяаьтдиз алахьурайи читин месэлйир гьял апIуз кюмек тувуб ву.

 
Проектдин конкурсдиъ иштираквал апIуз муниципалитетарихьан гъюрайи проектар, асас вуди жямяаьтлугъ инфраструктура артмиш апIуз – культурайин объектар вая рягьятвалар гъадагъру йишвар, штун, спортдин, туризмйин объектар ва бицIидари тамшйир апIру майднар тикмиш апIуз – вуйидар духьну ккунду. «Ерли жягьлувалар» проект гьацдар йишвар цIийи алауз вая тикмиш апIуз кIури, уьмриз кечирмиш апIурайиб ву.

 
Къайд дапIну ккундуки, проектдиъ иштирак хьпан бадали, улупнайи варитIан асас шартI – гьюкуматдин терефнаан туврайи дакьатарихъди сабси, муниципалитетдин бюждетдианра пул ва меценатарин кюмек ккунду.