Гюльнара Мягьямедова
Дагъустандин гъулан мяишатдин ва ипIру-убхъру сурсатарин министерствойи «Агромотиватор» грант тувбан конкурсдиъ иштирак шлударин документар кьабул апIуз хъюгъна. 

Гьюкуматдин терефнаан думу жюре кюмек гъулан мяишатдин цирклиъ хусуси бизнес ккатIабццуз ккуни хусуси метлеб айи дявдин операцияйин ветаранариз ва иштиракчйириз тувди.
Программа Ватан гъюбхдар гъулариъ ляхнихъди тямин апIбиина, бицIи предпринимателвал артмиш ва ипIру-убхъру сурсатарин хатIасузвал мюгькам апIбиина жалб дапIна.

 
Грант уртахъди пул харж апIбан шартIариинди тувру: гьязур дапIнайи бизнес-проект уьмриз кечирмиш апIруган, диди 90 процент харжар ккеркру. Мисал вуди гъадабгъурхьа: мал-къара уьрхбан проектариз 7 миллиондиинакьан, хъа гъулан мяишатдин имбу ляхнариз 5 миллиондиинакьан пул тувру. Гьаддиз, 10 проценткьан хусуси дакьатарра ади ккунду.
Пулин дакьатар гъулан мяишатдин техника ва оборудование, малар гъадагъуз, малар тIаъру йишвар, искалатар тикмиш апIуз харж апIиди.

 
Конкурсдиъ Урусатдин Федера-цияйин ватандашар – мобилизацияйиин къайдайиинди дявдин гъуллугъназ дих дапIну, хусуси метлеб айи дявдин операцияйиъ иштирак гъахьи ва гьамус запасдиъ айидарихьан, хусуси метлеб айи дявдин операцияйиъ контрактдиинди гъуллугънаъ гъахьидарихьан, духтрарин улупбариинди гъулан мяишатдин ляхин гъабхуз ихтияр айи дявдин женгариъ сакьат гъахьидарихьан иштирак хьуз шулу.
Аьрзйир 30-пи сентябризкьан ГИИС «Электронный бюджет» мялуматарин гъурулушдиъ кьабул апIуру.
Документар гьязур апIруган ва бизнес-план бикIруган, конкурсдиъ иштирак хьуз ккунидариз министерствойин «Мялуматаринна консультацйир гъахру гъуллугъ» ГБУ-йин пишекрари кюмек апIиди.