Наргиз Гюлечова

 
16-пи августди Урусатдин премьер-лигайин 4-пи турин дахилнаъди Самарайин «Солидарность Самара Арена» стадиондиин футболин матч кIули гъубшну. Душваъ Мягьячгъалайин «Динамо» ва Самарайин «Крылья Советов» футболин командйир гюрюшмиш гъахьну.

Сабпи тайм ккебгъну 5-пи дакьикьайиъ Мягьячгъалайин командайин футболист Андрес Аларконди Самарайин командайиз сабпи гол ипну. Уйнамиш давам шули 22-пи дакьикьайиъ стадиондин эйсйириз Мягьячгъалайин «Динамойин» полузащитник Никита Глушковди сабсана гол ипнийи, хъа 5 дакьикьайилан ихьдаризра Иван Олейниковди саб гол ипну.

 
Кьюбпи таймдин 77-пи дакьикьайиъ Даниил Лесовойди «Крылья Советов» командайиз 3-пи гол ипнийи. 83-пи дакьикьайиъ арбитри Самарайин командайин футболист Чинеду Джеффрийиз, «Динамойин» футболист Андрес Аларкондиз зиян тувбаз лигну, уьру карточка улупнийи, ва «Крылья Советов» командайикан майдандиин 10 кастIан илимдайи.

 
Асас вахт ккудубкIбан кьяляхъ матчдин арбитри, аьлава вуди, 4 дакьикьасана иливнийи, ва гьадмуган Гьямид Агъаларовди стадиондин эйсйириз 4-пи гол ипну. Натижайиъ матч 4:1 гьисабниинди ккудубкIну.

 
Му Мягьячгъалайин командайин юкьуб туриъ гъахьи талитарикан 3-пи гъалибвал ву. КIули гъушу 4 турин натижйириинди, ихь команда 4-пи йишв’ин ал.

23-пи августди 5-пи туриъ ихь футболистар Каспийскдиъ «Анжи Аренайиин» «Краснодар» командайихъди гюрюшмиш хьиди. Гьамусяаьт думу сабпи йишв'ин ал. Багъри командайихъан юкIв убгрудар стадиондиина гъачай.