Зубайдат Шябанова

КIулди уьлкейиъ, хъасин республикайиъ мялимарин августдин совещанйир гъахбан кьяляхъ, душвариъ туву табшуругъар ва цIийи урхру йисан улихь дивнайи планар ачухъ апIури, Дагъустандин вари районариъ ва шагьрариъ образованйирин управленйириъ ва отделариъ совещанйир кIули гъушну. ИкибаштIан, му месэлайин гьякьнаан Табасаран районра кьяляхъ гъубзундар.

Совещание Хючна гъулан Культурайин хулаъ Табасаран райондин глава Мягьямед Къурбановдин регьберваликкди кIули гъубшну. Серенжемдиъ РД-йин Халкьдин Собраниейин депутат Алавудин Мирзабалаев ва Р. Гьямзатовдин ччвурнахъ хъайи ДГПУ-йин тарихдин факультетдин декан Закир Мирзаев иштирак гъахьну.

 
Мягьямед Къурбановди уч духьнайидар къаршуламиш апIури, улихьна йигъан райондин делегация Дагъустандин глава Федор Щукиндин регьберваликкди гъубшу августдин совещаниейиъ иштирак гъахьиваликан ктибтнийи.
«Образованиейин цирклиъ Табасаран райондин хайлин хъуркьувалар а. Заан аьгъювалариинди урхуб ккудубкIну, медалар гъадагъдарин кьадар артухъ гъабхьну. Цци дурарин кьадар 67 ученик ву. Му улупуб гъубшу йисахь тевган, кьюб ражари артухъ ву. Амма гьаму йисан 100 баллиз ЕГЭ тувур сарра адархьуз. Ихь метлеб мектеб ккудубкIдар аттестат адарди сарра гъудрузуб вуйихь. Му метлеб кIулиз адабгъбаъ ичв пишекарвалик ва жавабдарвалик умуд кивраза», – гъапну райондин главайи мялимарихьна ва директорарихьна илтIикIури.
Совещаниейин иштирак-чйир РФ-дин мярифатнан министр Сергей Кравцовдин видео-илтIикIбахъ хъпехъбан кьяляхъ, райондин образованиейин цирклиъ 2025-2026-пи урхбан йисарин натижйирикан ва цIийи урхбан йисаз диврайи планарикан Табасаран райондин образованиейин управлениейин кIулиъ айи Аьбдусалам Гьясановди ктибтну. Дугъу чан докладдиъ къайд гъапIганси, Табасаран район 2022-пи йисхъанмина «Мектебарин образованиейин гъурулушдин модернизация» программайиъ иштирак шула. Думу программайин бинайиинди райондиъ 13 мектеб рас гъапIну. Гъюру йисан программайин дахилнаъди ТинитI гъулан мектеб рас апIуз планарик ка. Гьаму йисан республикайин бюджетдин дакьатарихъ райондин гимназияйиъ расвалин ляхнар гъухну. Гьацира Хюрикк гъулаъ 500 урхурайириз йишв айи аьхю мектеб тикмиш апIбан ляхнар гъягъюри ими.

 
Аьбдусалам Гьясановди 2026-пи йисан 1-пи сентябрихъанмина мектебарин ляхниъ шлу цIийивалариканра ктибтну.
Закир Мирзаевди чан улхбаъ асас фикир мектебариъ мялимар гьуркIри адрувализ тувну. Дугъан гафариинди, эгер гьарсаб райондиъ фицдар мялимарин игьтияж’вал аш ахтармиш апIуз гъабхьиш, думу месэла гьял апIуз шулу.
Совещаниейиъ 2026-2027-пи урхбан йисари образованиейин гъулуруш мюгькамди артмиш шлу асас месэлйир атIагнайи резолюция кьабул гъапIну ва Табасаран райондин образованиейин совет тяйин гъапIну.
Аьхириъ республика-йин ва гьюкуматдин дережйириъ заан хъуркьувалар гъадагъу мялимариз пешкешар тувбан мажлис кIули гъубшну. КIакIначйирин арайиъ мектебарин мялимар, бицIидарин багъарин тербиячйир ва аьлава дарсар кивру мялимар айи.
Пешкешар тувбан кьяляхъ Мягьямед Къурбановди мялимвалин пишейиз гьар вахтна аьхю гьюрмат ади хьувал къайд гъапIийи. «Мялимар жямяаьтдин даягъ ва далу ву. Учв’ин ихь аргъаж шулайи наслиз аьгъювалар ва тербия тувбан аьхю жавабдарвал ал. Гьаму игит ва баркаллу ляхин гъабхурайи райондин вари мялимариз кIваантIан чухсагъул кIураза», – аьлава гъапIнийи Мягьямед Къурбановди.