Умгьанат Сулейманова
2026-пи йисан 4-пи авгъустди, РД-йин образованиейин ва илимдин министерствайин буйругъназ асас вуди, Дагъустандин Огни шагьрин образованиейин управлениейин гъуллугъниин Гьямзалиев Назим Гьямзалиевич тяйин гъапIну.

Назим Гьямзалиев Табасаран райондин ЦIуртIиль гъулаъ 1973-пи йисан бабкан гъахьну. Думу бицIиди имиди, дугъан абйир-бабар Дагъустандин Огни шагьриз кюч гъахьидар ву. Дагъустандин Огни шагьрин 5-пи нумрайин мектеб 1990-пи йисан ккудубкIну, гьадму йисан Мягьячгъалайиъ ДГУ-йиъ тарихнан факультетдик урхуз кIучIвру. Думу ккудубкIбан кьяляхъ 1995-пи йисан Дагъустандин Огни шагьрин 4-пи нумрайин мектебдиз тарихдин дарсарин мялимди гъадагъуру. Юкьуд йисан душваъра мялимвал дапIну, Назим Гьямзалиев хьуд йисанкьан айтIан ляхнарин гъуллугънаъ гъилихну. Душваъ дугъу капитан ччвура гъадабгъну, мектебдиз кьяляхъ гъюру, ва 3-пи нумрайин мектедиз мялимди гъюру. 2006-пи йисхъан 2019 пи йисазкьан тарихнан дарсарра киври, мектебдин директорин урхбан ва тербияламиш апIбан ляхин гъабхурайи заместительди гъилихну. Ва 2019-пи йисхъан 2006 пи йисазкьан 2-пи нумрайин директорди лихуру. Дупну ккундуки, варидари Назим Гьямзалиев му гъуллугъназ лайикь вуйи кас вуди гьисаб апIура. Образованиейин цирклиъ баракаллуди зегьмет зигбаз лигну, думу гьюкуматдин терефнаанра лишанлу дарапIди имдар – дугъаз «Урусатдин мярифатнан гьюрматлу гъуллугъчи» ва «Мярифатнан отличник» ччвур тувну. Назим Гьямзалиевди Дагъустандин Огни шагьрин жямяаьтлугъдин арайиъра аьхю гьюрмат гъазамиш гъапIну. Думу варидарихьна сабси янашмиш хьуз аьгъю руководитель ву. Дугъу, дюз жаваб ккундуш, сифте бицIирахьан гьерхайи дупна. Ухьу бицIидар духьну, хъа аьхю шулайидар вухьа. Гьаци вуйиган, бязиган бицIидарихъра хъебехъну ккунду. Дурарихъди аьхюдарихъдиси гафар дапIну ккунду, дурарин хусуси фикрара саспиган назарназ гъадагъну ккунду. Мялим ужур психолог духьну ккунду. БицIирин уьмриъ мектеб варитIан асас йишв ву, мушваъ дугъан инсанвалин гъанажагъ тяйин шула. БицIир фуну рякъюъди гъягъюраш, дугъкан гележегдиъ фицир инсан ктучIвуруш, мялимдиз вахт ккимиди рябкъну ккунду».

 
Бахтнаанси, бицIидарихъан юкIв убгурайи мялимар, директорар ими, дурарихьан чпин ляхин дарапIди гъузуз шулдар. Ихь Назим Гьямзалиевич гьацдар касарикан ву.

 
Ва гьацира Назим Гьямзалиев ужуб гъудубкьу хизандин эйсира ву. Дугъу чан уьмрин юлдаш Руминайихъди шубур велед тербияламиш гъапIну, кьюр бай ва сар риш. Риш Диана Каспийск шагьрин Урусатдин Игит М.Г. Магомеджановайин ччвурнахъ хъайи многопрофильный гимназияйиъ мялимди лихура. Дурарин Аьли ва Саид кIуру кьюрид баярира РФ-йин Яракьлу Кьувватариъ гъулуъ гъабхура.