Зубайдат Шябанова

Сентябрин 1-пи йигъан Табасаран райондин образованиейин 57 идарайиъ урхбан цIийи йисаз бахш дапIнайи шадлугънан линейкйир кIули гъушну. Мектебарин партйирихъ гьаму йисан 7 агъзур бай-риш деъну, дурарикан 630 сабпи классдиз гъягъюрайидар ву.

Вари мектебариъ серенжем ачмиш апIру вахтна Урусат Федерацияйин Гьюкуматдин пайдагъ хьади удучIвдар жюрбежюр конкурсариъ ва олимпиадйириъ гъалиб гъахьидар ва призерар вуйи.
Думу йигъан Табасаран райондин глава Мягьямед Къурбанов райондин гимназияйиъ ва Хючна гъулан 1-пи нумрайин лицейиъ гъягъюрайи серенжемариъ иштирак гъахьну.

 
Къайд дапIну ккундуки, райондин гимназия абццну цци 20 йис шула. Гьаму йигъари душваъ капитальный расвалин ляхнар духну ккудукIну. Гимназияйин директор Элина Шихмягьямадовайи Дагъустан Республикайин Правительствойин кIулиъ айидариз ва муниципалитетдин глава Мягьямед Къурбановдиз кюмек ва фикир тувбаз чухсагъул мялум гъапIну.
«Сабпи классдиз гъягъюрайи бицIидариз му важиблу йигъ ву. Дурариз мектебдин уьмриъ хъуркьувалар ва гележегдиъ уьлкейин варитIан улихь хьайи вузарин студентар хьуб ккун апIурхьа. Гъит ихь мектебар медалистариинди ва ЕГЭ 100 баллиз туврудариинди машгьур ишри. Мялимариз чпин баркаллу зегьметнаъ сабур, ужудар ва лайикьлу урхурайидар ккун апIураза. Гьаму цIийи урхбан йис варидариз хъуркьувалар ва ужудар мумкинвалар айиб ибшри», – гъапну райондин главайи.
Думу йигъан узу Табасаран райондин швнуб-саб мектебдин директорарихъди сюгьбатар гъухнийза. Гисик гъулан мектебдин директор Гьяжи Гьяжиевди къайд гъапIганси, дурарин мектебдиъ 58 касди урхура. Дурарикан 6 бицIир цци сабпи классдиз гъафидар ву. Ккергъбан классариъ айидариз, хусуси метлеб айи дявдин операцияйиъ иштирак шулайи эскрарин шубур веледдиз ва сар маиф бицIириз мектебдиъ мани хураг гьивра. Му мектебдиъ Гисик ва Ляхя гъулан хизанариан вуйи бицIидари аьгъювалар гъадагъура.
ТIюрягъ гъулан мектебдин директор Айнудин Кьасумовди чпин гъулаъ сабпи классдиз цци 15 бицIир гъафибдикан ва сарсана бицIирин документар гьязур апIурайибдикан гъапну.
«Ич мектебдин классар анжагъ 12 бицIиризтIан йишв айидар дар. Думу бицIидарин кьюб класс апIуруш вая саб классдиъ гъитруш, му месэла райондиъ гьял апIайиз ккилигурача. Ич мектеб 1966-пи йисан тикмиш гъапIуб ву. Думу ерси дубхьна. 2022-пи йисан мектебдиъ капитальный расвалин ляхнар гъухнийча. Расвалин ляхнарин кьяляхъ классар бицIи гъахьну. Гьамусяаьт мектебдиъ 159 бицIир айич. Дурари кьюб сменайиъ урхура. Аьхиримжи дарс хябяхъган сяаьт ургубди ккудубкIура. БицIидар гьадму вахтназ гъудрузбан бадали, ккергъбан классарин дарсар ккудукIубси, кьюбпи сменайиъ айи бицIидарин дарсар ккергъра», – къайд апIура мектебдин директори.

 
Айнудин Кьасумовдин гафариинди, дурар цIийи мектеб тикмиш апIбан гьякьнаан швнуб-саб ражари кагъзар хьади илтIикIну. Амма му месэла гьелелиг гьял апIуз шуладар. Гьаддихъди сабси, ерли меценатарин дакьатарин кюмекниинди мектебдин гъвалахъ 15 миллиондин ккайи спортзал тикмиш апIура. Думу тикилиш цIийи йисаз ккудубкIуз планарик ка. Спортзал тикмиш апIуз дакьатар жара гъапIдар Мирзялиев Назим ва Шябанов Велибег ву. Кьюриддира улихьна йисари ТIюрягъ гъулаъ цIийи мистра дивнийи. Гьамус думу баяри гьацира, чпикантина гъуландариз ва мектебдиз багъиш дапIну, спортдин юкIв алидар машгъул хьуз спортзал дивуз йикьрар гъапIну.

 
Йирси мектебдиъ урхурайи баяр-шубаризкьан бегьем йишв адру ужагъдиъ, ккергъбан классариъ урхурайидариз мани хураг гьивбан месэла фици гьял апIураш, гьерхнийза. ВуйиштIан, дурари мектебдиъ урхурайидариз мани хураг улихьди халачйирин фабрика ади гъабхьи, гьамус ккадахьну дирчнайи хулариъ гьивра.
«Гьадму фабрика ич мектебдин гъвалахъ хъайиб ву. Душваъ улихьди актовый зал ади гъабхьну. Гьадму йишв вахтназ вуди учухьна тувна. Учу ич дакьатарихъ думу залиъ цIийи полар ккахьунча ва, саб бицIи расвалин ляхнар духну, 50 бицIириз сабишв’инди хураг гьивру йишв гьязур гъапIунча. Гьюкуматдин санитарияйин инспекторари пищеблок жаради адруган, цалар йирсидар вуйиган, швнубсабан штрафарра гъапIнийич. Дурар, вахт-вахтарик гъюри, учухъди улхури шулу. Хъа гьюкуматди тутруву пищеблок, йишв адру йирси хулариъ учу фици дивча? Гьаци вушра, утIурайи кьулар гьюдюхюнча, полиз шир гъивунча ва спортзализ духнайи материаликан гьамушвра къайдайиз хуз рякъяр агурача», – гъапну Айнутдин Кьасумовди.
ТIюрягъ гъулаъ цIийи мектеб адар, хъа гьаци вушра, урхурайидари ужудар аьгъювалар гъадагъура.
ТIюрягъ, Гисик ва райондин вари мектебариъ сабпи йигъан сабпи дарс «Важиблубдикан сюгьбатариз» бахш дапIнайиб гъабхьну. Гъит ихь баяр-шубариз, мектебарин читинвалариз дилигди, заан аьгъювалар гъадагъуб кьисмат ибшри.