Наргиз Гюлечова

 
24-пи июлихъанмина Урусатдин футболин премьер-лигайин 2026-2027-пи йисарин фасил ккебгъна. Мягьячгъалайин «Динамо» командайин 1-пи турин сабпи талит Воронеж шагьриъ «Факел» командайихъди кIули гъубшну.

Талитнан сабпи пайнаъ Дагъустандин команда кьабул апIурайи эйсйири ухьуз сабпи гол ипнийи. ЦIиб арайилан дурари чпи чпиз автогол ипбиинди гьисаб 1-1 гьабхьну. Хъа талитнан кьюбпи пай аьхирихъна хъубкьрайиган, «Динамойин» футболист Александр Сандрачукди «Факелиз» сабсана гол ипну, гьисаб 1-2 гъабхьну. Натижайиъ Мягьягъалайин командайи цIийи фасил гъалибвалилан ккебгъну.

 
Къайд дапIну ккундуки, 2024-пи йисан декабрин вазли гьаму стадиондиин, гьаму командайихъди вуйи футболин талитнаъ айи Александр Сандрачукдин ликриз аьхю зиян гъабхьнийи. Сад йисанна гьацIан арайиъ дугъаз футбол уйнамиш апIуз духтрари ихтияр тувну адайи. Магьа цIийи фасил ккебгъубси, чаз зиян гъабхи стадиондиин дугъу му командайиз гол ипну, гъалибвалиинди Дагъустандиз кьяляхъ гъафну. Думу гьацира талитнан варитIан ужур футболист вуди гьисаб гъапIну
КIваин апIурхьа, цIийи фасил ккебгъайиз улихьна, 22-пи июли Мягьячгъалайин футболин командайи «Анжи Арена» стадиондиин чпин гьевескрариз ачухъ тренировка кIули гъубхну. Гьадмуган командайин кIулиъ айидари уч духьнайидариз фаслихьна гьязур хьубкан, командайиз цIийи футболистар гъадагъбакан ва гьял дапIну ккуни жара месэлйириканра ктибтнийи.
Гьамусяаьт команда 1-пи августди «Анжи Арена» стадиондиин Москвайин «Локомотив» командайихъди вуйи РПЛ-лин 2-пи турин талитнахьна гьязур шула.