Ватан уьбхбан гъуллугънаъ
Феруза Рамалданова
Гъи уьлкейин гьякьикьат дибдиан дигиш шули, жигьиларин уьмрихьна вуйи лигбар асуллагь жарадар шулайи вахтна ухькан гьарсари багъри Ватандин хайирназ вафалуди зегьмет зигурайи, яракьлу кьувватарин жергйириъ гъуллугъ апIури, ужудар хъуркьувалариинди лишанлу шулайи кьягьял ватанагьлийириинди дамагъ апIурахьа. Хъа Урусат бадали вафалувалиинди гъуллугъ гъабхурайи кьягьяларра ухьуз цIиб адар. Дагълуйирин рюгьнан кьувватниинди тербияламиш гъапIу ихь кьягьялари гъи, саб шакра адарди, хусуси метлеб айи дявдин операцияйиъ ватандин маракьар ва ватандашарин ислягьвал уьбхбаъ Урусатдин президентди яракьлу кьувватарин вакиларин улихь дивнайи буржи ва ляхнин вазифйир намуслувалиинди тамам апIура.
Уьлкейин саламатвал уьбхбан гъаравлиъ айидарин жергйириъ ихь ватанагьли Ибрагьим Бебековди лайикьлу йишв дибисна. Ибрагьим Низлудинович Бебеков 1985-пи йисан 15-пи сентябри Хив гъулаъ зегьметкеш хизандиъ бабкан гъахьну. Багъри гъулан мектеб ужудар аьгъювалариинди ккудубкIу жигьили, Ватандиз гъуллугъ апIбан метлебниинди, 2003-2007-пи йисари Москва шагьрин военный институтдиъ урхуб давам гъапIну. Гьадушв’ан жигьил офицерин дявдин рякъра ккебгъну.
– Узу бицIи вахтналанмина дявдин гьяракатарикан вуйи шиклариз, кинйириз аьхю аьшкьниинди лигури шуйза. Йиз уьмур ижмишнаан ватан бадали гъуллугъназ сарф апIуз ниятра гъапIнийза. Мектеб ккудубкIу йисан узу Москвайин дявдин институтдиз курсантарин жергйириз кьабул гъапIнийи. Йиз метлебнахьна рукьбан бадали зегьмет зигуз ижмишнаан кьаст гъапIнийза. Вахтар ухди гъягъюру: узу йиз уьмур яракьлу кьушмарихъди сатIи дапIну гьамус 23 йис ву. Украинайин аьтрафариин нацистариз аьксиди хусуси метлеб айи дявдин операция мялум гъапIу йигъланмина учухьна вуйи тIалабар лап ижми, хъа вазифйир артухъ гъахьну. Амма дявдин рякъ кадабгъбиин узу сабанра швумал гъахьундарза. Гьюкуматдира гъи дявдин гъуллугънаъ айидариз лазим вуйи кюмекар тувра. ТIалабарра улупура, увуз яшайишдин шартIарра яратмиш апIура. Мициб аьгьвалатнаъ гьюкмиз аькси улхбар гъахру жигьиларин гъавриъ адарза. Гъи ихь варидарин асас метлеб душман дармадагъин апIуб вуйихь. Метлеб тамам апIрувалинра шак адар! Гъалибвал ихь терефнаъ хьибди! – кIура кьягьяли.
Ибрагьим Бебековдиз дявдин ляхникан яркьуди ктибтуз ккундар. Дугъанра гъаври духьну ккунду: дявдин сир уьбхюб дугъан буржи ву. Дугъан ляхин аьхиримжи йисари гьам жавабдар вакилари, гьамсана дявдин гьяракатарин гьякьикьатди ахтармиш дапIна. Натижайиъ ихь ватанагьли уьлкейин ва оборонайин минстерствойин кIулиъ айидарин терефнаан заан кьиматназ лайикь духьна. Вафалуди гъуллугъ гъабхбаз лигну, подполковник Ибрагьим Бебеков Урусатдин миноборонайин терефнаан 2026-пи йисан I, 2019-пи йисан II ва 2014-пи йисан III дережайин «Дявдин гъуллугънаъ тафавутлу хьпаз лигну», I ва II дережйирин «Ватандин улихь тафавутлу хьпаз лигну», «Дирбаш’вализ лигну», «Эскервалин жюрэтлувализ лигну» ва хайлин жара медалариинди, Кьягьялвалин ордендиинди лишанлу дапIна. Дугъан ватанпервервал фикриз гъадабгъну, ихь ватанагьлийиз Дагъустан, ДНР-ин ва гьамус Чечен Республикйирин Игит ччвурар тувна.
«Ватандиз гъуллугъ апIуб, гьелбетда, рягьят ляхин дар. Варидари эрг’вал йивруган, дурар гъуллугъниин хьуб чарасуз ву. Хизандихъдира ккуниганси вахт адапIбакан ич ухдитIан кIваълан дубшнайич. Учу 2007-пи йисан хизан ккебгънийча. Шубур гюрчег шубарра ачуз. Сабпи йигъланмина Ибрагьим хизандихьан, чаз багъри инсанарихьан хайлин муддатнаъди ярхла командировкйириз гъягъювал чара адарди кьабул гъапIнийза. Хусуси метлеб айи дявдин операция ккебгъбахъди му гьякьикьат лап гъагъи гъабхьну. Узу ва ич шубар гьар вахтна дугъаз тамарзуди ккилигурача. Тялукь аьгьвалатнаъ вари читинвалар аьгь дапIну, намуслуди гьюкуматди улихь диву метлебарихъ хъуркьуз жилириз хизандианра кьувват тувну ккунивалин гъавриъ аза. Ибрагьимди чан хизан дявдин рякъюъ чаз далу вуйивал гьисс апIбан бадали, узхьан шлу зегьмет зигураза. Фицики фуну дюшюшдиъра думу Ватандин намус ва азадвал уьбхюз гьязур вуйивалин ижмишнаан гъаври аза!» – къайд апIура ич улхбаъ игитрин уьмрин юлдаш Дилара Бебековайи.
Ватандиз гъуллугъ апIурайи кьягьял табасаран жигьилариз гележегдиъра хъуркьувалар ишри! Гъит уьлке ислягь ибшри ва гьарсар чан хизандихьна сагъ-саламатди гъюри!