Гъябгъюрайи йисан октябрин 16-диъ Табасаран райондиз Уьмарла Батырайдин ччвурнахъ хъайи Даргйирин гьюкуматдин музыкайина драмайин театр бицIидариз вуйи «Гуглахай» кIуру махъв хьади гъафнийи. Му махъв гъибикIур Дагъустандин халкьдин шаир Рашид Рашидов, хъа думу сягьнайиин диву режиссер Урусатдин искусствийирин лайикьлу гъуллугъчи Мустафа Ибрагьимов ву, дидин художник Жанна Колесникова, композитор Мягьямед Кьасумов ву. Думу махъваъ иштирак шулайидар дДагъустандин лайикьлу артистар ву: махъв ктибтурайир — Мухтар Нухов, марччлихъан — Аьбдуллагь Ризванов, сул — Саният Каримова, гавхар — Аминат Доциева, жанавар — Нурбагьанд Идрисов. Мидланра гъайри, махъв сягьнайиин улупбаъ жара артистарира иштирак’вал гъапIну: гуглахай — Сакинаханум Ильясова, гуг — Ислам Гьясанов,   лахай  — Лейла Магьандялиева.

Му бицIидариз вуйи музыкайин махъв уж’валнакан ва харживаликан, гьацира яркврариъ айи гьяйванатарин дустваликанна сатIиваликан ву. Вари махъвар уж’валниинди ккудукIну ккунду. Гьаддиз махъврак дубкIнайи жанавар чIиви дапIну, дидин аьхириъ ярквраъ айи вари гьяйванатар сатIи, думу жанавар вари гьяйванатарин дуст шулу. Му махъв сабпи ражари Хюрикк гъулан бицIидариз улупнийи, хъасин Хючна гъулан мектебариъ урхурайи баяр-шубариз Табасаран райондин культурайин Хулаъ улупну, гьацира думу Цалак гъулаъ айи бицIидарин багъдиъра улупну. Махъв бицIидариз лап кьабул гъабхьнийи. Даргйирин гюкуматдин музыкайинна драмайин театрин артистар му махъв хьади Табасаран райондин жара гъуларизра гъягъбанди ву.