Гъи, 22-пи октябри, вари Урусатдиъ Расул Гьямзатовдин лизи кьарнийирин Йигъ къаршуламиш гъапIну.
Аьдат вуйиганси, Хив райондин мектебариъра му йигъахъди аьлакьалу серенжемар кIули гъахури шулу. Нубатнан ражари Хив райондин М.Шамхаловдин ччвурнахъ хъайи Хиварин кьялан мектебдиъ му йигъаз тялукь вуйи ачухъ дарсар тешкил, цалин газатар гьязур, тарихнахъди аьлакьалу кроссвордар дюзмиш гъапIну, шиърар, сягьнйир улупбан мяълийирин талитар кIули гъушну.
Мидланра савайи, райондин кьялаъ айи Гъалибвалин паркдиъ линейкара гъубхнийи. Линейкайиинра мялимари ва баяр-шубари эсерлуди шиърар гъурхнийи ва мяълийир гъапIнийи. Серенжемдин аьхириъ, уьмриан гъушу эскрар кIваин дапIну, вари саб дакьикьайиъ ккебгъну дийигънийи ва лизи кьарнийирин ядигарихъ баяр-шубари чпин хилариинди гьязур дапIнайи кюкйир, кагъзарикан дапIнайи кьарнийир ядигарихъ дивнийи.
Мектебдин директор вуйи Физули Аьбдулязизовди чан ва администрацияйин терефнаан мектебдиъ тербияйин ляхин гъабхурайи директорин заместитель Рауф Аьгьмедовдиз, бицIи классарин мялимар вуйи Светлана Идрисовайиз, Ума Рамазановайиз, бабан чIалнан ва литературайин мялим вуйи Тамила Аьлипашаевайиз ва серенжемдихьна гьязур духьнайи урхурайдариз чухсагъул мялум гъапIнийи. Хъа вари халкьдиз КIул’ин гьарган аку зав, дюн’яйиъ ислягьвал хьувал ккун гъапIийи.
