Гъябгъюрайи гьяфта Хив райондин гъулариъ варитIан аку гьяфта ву гъапишра, узу гъалатI даршул. Фицики гьаму гьяфтайиъ хайлин йисари культурайин хуларин сягьнйириин улулупрайи концертдин мяракйир, театрин спектаклар, шадлугънан серенжемар кIули гъягъюра.
Гьаму йигъари табасаран театр Хив райондин гъулариз гастролйириз гъябгъбан бадали Гьюкуматдин табасаран драмтеатрин директор Аьлимурад Аьлимурадов Хив райондин глава Ярмет Ярметовдихьна илтIикIнийи, ва дурари тялукь йикьрар гъийитIнийи. Думу йикьрариз асас вуди, театрин гъуллугъчйири юкьуд йигъандин арайиъ чпин яратмишар миржиб гъулан агьалйириз улупну. Октябрин 21-пи йигъан – Гъвандикк ва ЦIудихъ, 22-пи октябриъ – Асккан-Яракк ва ГъуштIил, 23-пи октябриъ – Зилдикк ва Мажвгул, хъа 24-пи октябриъ – Лика ва Хив гъулариъ.
Мидланра савайи, культурайин, спортдин, жигьиларин политикайин ва туризмдин отделин начальник Казбек Къазиевдин тIалабниинди ва къарарниинди РКДЦ-йи гьязур дапIнайи ва чIанади вуйи концертра райондин гъуларин культурайин хулариъ улупура. Газатдин нумра чапдиан удубчIвайиз, концертар Ургъа, ГъуштIил, Гъвандикк ва ЦIудихъ гъулариъ гъягъиди.
Хъа имбу гъулариъ концертар гьаму къайдайиинди улупиди: 25-пи октябриъ – Асккан-Яракк, 29-пи октябриъ – Мажвгул, 30-пи октябриъ – ЦIийи-Фрюгъярин гъулаъ ва 31-пи октябриъ – ГъванцI’ил гъулаъ.
Пуз ккундузузки, гъийин йигъанси дарди, цIиб улихьган халкьди шадвалин мяракйириз ужуб кьимат тувуйи, агьал-йириз шадвал апIузра ва шадвал чпин арайиъ пай апIузра аьгъяйи. Гъулаз гъирагъдилан гъафи касдиз, пягьливнариз, театрин, концертдин артис-тариз гьюрмат айи, дурариз тамаши апIуз вари гъуландар гъюйи, культурайин гъуллугъчйирихъан, гьарури чахь дерг кIури, хътаркурдайи. Тамаши апIуз гъюру дишагьлийирин хилариъ убхурайи атIин, жилетка шуйи, жиларин хиларигъ – убхурайи малин гардандиъ тIапIру тIурин, илдибтIурайи тIулин мургул шуйи. Эрг’вал йивуз дуфнашра, ляхникан сикин шулдайи. Аьхюдари баяр-шубарихьди сягьнайилан кIурайибдихъ дикъатлуди хъпехъуз гъитуйи.
Хъа гъи улупурайи сягьнайиз улихьганси кьимат тувувал амдар, бицIирилан-аьхюриина гъадагъну, варидин хилиъ айиб телефон ву. Культурайин хулаъ айи кусрийир удугъуб, пуч апIуб, семечкйир дитIну, чIюрх-чIувал апIуб, кьюб футна дапIну, адру-дару гафар-чIалар кадагъну, улупурайи сягьнайикан я жвуву, я жарарихьди мяна гъадабгъуз, мянфяаьт ктабгъуз гъидритуб – магьа гъийин тамашичйирин гъиллигъар!
Гьюрматлу ватанагьлийир, гъит, культурайин хулариан акв ва шадвалин манишин кам дарибшри! Ухьуз шадвалин дакьикьйир артухъди бахиш апIуз ихь сягьнайиин али касаризра сагъ’вал туври, чпин ляхниъ дурариз заан хъуркьувалар ккун апIурхьа. Хъа дурариз дикъат, кьимат тувуз ва гурлу гарччлар йивуз ухьузра амур ва кьисмат ибшри!
