Дагъустандихьан ярхлаъ айи шагьрариъ яшамиш шулайи ватанагьлийир ватандихъ, багъри чIалнахъ, культурайихъ гьаммишан тамарзуди шулу. Ва ватандаш артистарин концертдин программйир чпин шагьриъ гъягъру вахтназ гизафдар шаду серенжемдизси ккилигуру.
Гьаци вуйивалиин узу, гьаму йигъари Санкт-Петербург шагьриъ кIули гъубшу табасаран концертдиз дуфнайи ихь ватанагьлийир гъяркъиган, инанмиш гъахьунза. Ватандихьан ярхлаъ айи Урусатдин жюрбежюр шагьрариъ табасаран концертар тешкил апIувал думукьан рягьят ляхин дар. Концерт тешкил апIуз пулин хайлин дакьатар, думу гъабхру йишв, дидиз реклама лазим ву. Гизаф дюшюшариъ удучIву харжар концертари ккеркрира шулдар. Узуз, чпиз шлу хайир вая зарар гьисабназ гъададабгъди, Урусатдиъ яшамиш шулайи ихь ватандашарин юкIвар шад апIури, гьадушвариз ихь артистар хъади гъягъю-райи Архимед Исмяиловдиз, Аьлимурад Аьлимурадовдиз, Насир Седировдиз, Тельман Абукаровдиз чухсагъул пуз ккундузуз. Му баяри чпиз хайир шулуш вая зарарнаъ ахъруш я гьисабназ, я фикриз гъададабгъди, ихь ватандашариз концертдин программйир ва театрин сягьнйир тешкил апIура.
Санкт-Петербургдиъ гъабхьи концертдихьна хътакури, пуз ккундузузки, концертдиз дуфнайи вари тамашичйири чпин вахт кIваантIан шадди адапIнийи. Дурариз табасаран артистар Чювккерин Ризван, Эльмира Ханкишиева, Оксана Ханова ва Ислам Мирзаханов мяракайиан затра деетуз ккунди адайи. Му артистари чпин репертуариан гъапIу ужударсдар ва тазади гьязур дапIнайи мяълийири тамашич-йирик бегьем гьевес капIнийи.
Концертдин тешкилатчи Насир Седировдин гафариинди, Санкт-Петербургдизси, дугъу гьаму артистарихъди Буденовск ва Воронеж шагьраризра концертдин программа хьади гъушну. Гьаму жюрейин концертар Насири гъябгъюрайи йисан майин вазлиъ Москва ва Воронеж шагьрариъра тешкил гъапIну. Чан терефнаан дугъу гьаму шагьрариъ чпи кьабул гъапIу ва чпиз кюмек туву ватандашариз чухсагъул мялум гъапIнийи.
Насир Седиров гьамусяаьт Московский областдин Балашиха шагьриъ ерлешмиш дубхьнайи Росгвардияйин военный частнаъ контрактдин къайдайиинди лихура. Кьюб вазлилан контракт ккудубкIбан кьяляхъ, дугъу концертар тешкил апIбан ляхнихъ артухъси хъюгъюз ният дапIна.
Гъит, Насирин кIван ниятар, умудар тамам ишри, фицики бабан чIалниинди Урусатдин меркездиъ ва жара аьхю шагьрариъ мяъли ебхьруган, жвуван ватандихъан, культурайихъан, чIалнахъан артухъси дамагъ апIуз аьшкь шулу.
