Мейлан Нежефов
«Аьхюб ярхлаан ужуди рябкъюру» кIуру урус халкьдин мисал вардиз таниш вухьуз. Ихь бажаранлу писателарихьна ихь миллетдин арайиъ ккунивалин янашмиш’вал ва гьюрмат ади хьуб саб ву, хъа дурариз жара миллетари ва ярхла юрдариъ заан кьимат тувруган, думу ихь халкьдик дамагъ капIру хъуркьувал вуди гьисаб апIуз шулу. Бажаранлу табасаран шаир ва драматург Эльмира Аьшурбеговайин «Даимлугъ гьюдюхюрайиган» пьесайин бинайиин СтIал Сулеймандин ччвурнахъ хъайи Лезгйирин музыкайинна драмайин театри спектакль дивну, хъуркьувалиинди сягьнайиин улупурайивали, гьелбет, ухькан гьарсариз разивалин гьиссар тувра. Хъа улихьна йигъари Москвайиъ Курский областдин губернаторин литературайин премия туву шубур касдин арайиъ Эльмира Аьшурбеговайин ччвур айивали ухьук дамагъра кадрапIди гъибтрадар. «Табасарандин нурар» газатдин терефнаан ихь шаир му гьядисайихъди тебрик апIури, дугъаз мюгькам сагъвал ва литературайин сягьнайиин хъанара аьхю хъуркьувалар ккун апIурача.
Му литературайин конкурс Ватандин Аьхю дявдин вахтна Курский деккюйиин гъахьи машгьур женгарин 80 йис хьпаз бахш дапIнайи ва 2023-пи йисан хьадхъанмина башламиш дубхьнайи. Конкурсдин шартIариинди, Курский женгарин темайихъди аьлакьалу эсер (вая эсерарин гъварч) дибикIну ккундийи. Думу, сабпи нубатнаан, художествойин заан дережайинуб дубхьну ккундийи. Эсериъ Ватандин Аьхю дявдиъ ихь ватанагьлийири улупу игитвал атIабгну, аргъаж шулайи наслариз дидлан тербия шлубсиб мяна хьувалра чарасуз вуйи.
«Му конкурсдикан вуйи мялумат уларикк ккабхъган, узу «Табасарандин нурар» газатдиз улихьнаси дибикIнайи «Курскдин женгариъ дарчIиди кивур» макьала кIваин гъабхьнийиз. Ва думу макьалайин игит Аьлибег Гьяжибаевдин кьисмат бинайиъ ади, урус чIалниинди ихтилат бикIбанди гъахьнийза, – жаваб тувнийи конкурсдикан вуйи суалназ Эльмира Аьшурбеговайи. – Гьелбет, му ихтилат документальный саягънануб дар, дидик узу кадабгънайиб ва жара кьисматариан вуйиб гизаф ка».
«Эсер урус чIалниинди гъибикIнийза. Ихь чIалниинди дибикIну, думу таржума апIуз вахт имдайи. Гьацира думу кьабул вуйи дережайиз хуз хъуркьундайзу. Хъа чухсагъул чпиз, йиз ляхниз гьамциб заан кьимат тувдариз! Сабпи йишв Смоленскдиан вуйи шаир Юрий Кекшинди, кьюбпи йишв Вологдайиан вуйи писатель Геннадий Сазоновди гъибисну. Дурар кьюридра гъудуркьу ва машгьур урус писателар ву ва кьюриддира конкурсдиз китабар (эсерарин гъварчар) хъадаънайи. Гьациб мяракайиъ йиз шубубпи йишвра гизаф лайикьлу йишв ву», – аьлава гъапIнийи шаири.
