Хьадукар гъулан мяишатдиъ ляхин апIурайи нежбрарин варитIан гизаф гъайгъушнар айи, гьаддихьди сабси варитIан ужуб вахт ву. Хьадукран йигъу йис тухъ апIуру, кIуру мисал айиб ву.
Гъи, коронавирусдин тIягъвнихъди аьлакьалуди ихь уьлкейин саки вари регионариъси, Дагъустандиъра ипIру-убхъру сурсатарихъди вуйи аьгьвалатнан гьякьнаан хайлин гафар-чIалар арайиз гъафну. Амма, гъулан мяишатдин ва ипIру-убхъру сурсатарин Министерствойиан учуз туву мялуматариинди, ихь республика гъулан мяишат ужуди артмиш шулайи регион вуйивализ лигну, гъи мушваъ асас вуди лазим шлу вари сурсатар гьуркIну а.
Гьамусяаьт районариъ гъулан мяишатдин ляхнар жанлуди кIули гъягъюра. Ич сюгьбатнаъ РД-йин гъулан мяишатдин ва ипIру-убхъру сурсатарин министрин заместитель Эмин Шайхгьясановди къайд гъапIганси, республикайиъ коронавирусдихъди вуйи аьвалат гъагъиди вушра, инсариз хулаъ гъузай кIури ашра, хутIлар-багълариъ духну ккуни хьадукран ляхнар вари пландиинди гъягъюра.
Республикайиъ цци тазади 1,4 агъзур гектариъ жюрбежюр йимишарин ва гьациб кьадаркьан тIумтIин багълар кивуз ва гьаддихъди сабси 225 агъзур га хутIлариъ тумар урзувалра планламиш дапIна. Апрелиз 500 гектартIан артухъ йимишарин ва 165 гектариъ тIумтIин багълар кивну ккудукIна.
Кивуз планламиш дапIнайи багъларин кьадаркан хьадукран вазариъ 800 гектартIан артухъ йимишарин ва 200 гектартIан артухъ тIумтIарин цIийи багълар кивди, имбудар – чвлин вазариъ.
Хьадукран ляхнар гьамусяаьт ихь районарин гъулан мяишатариъра кIули гъягъюра. Табасаран райондин администрацияйин гъулан мяишатдин управлениейин кIулин агроном Даниял Гьяжиевдин гафариинди, цци райондиъ 40 гектариъ йимишарин, 70 гектариъ тIумтIин цIийи багълар кивуз планламиш дапIна. 16-пи апрелиз улупнайи кьадарнакан 10 гектариъ йимишарин багълар кивна, имбунудар чвлин вазари кивди. Хъа урзру тумарин гьякьнаан улхуруш, ццийин хьадукран вазариъ, яна гъийин йигъаз, Табасаран райондин хутIлариъ 58,5 гектариъ дяхин, 40 гектариъ мух, 25 гектариъ нюрх, 12 гектариъ гаргар, 78 гектариъ гизаф йисарин укIар кивна. Гьаддихъди сабси, 393 гектариъ картфар ва 210 гектариъ жюрбежюр жара йимишарра кивна.
Даниял Гьяжиевдин гафариинди, хьадукран ляхнар райондиъ гьяракатниинди гъягъюра.
«Гьамусяаьт саспи хутIлариъ изанра апIури ими. Багълариъ лазим дару цирклар ктIурчувалин ляхнарра аьхирихъна гъюра. Цци райондиъ кивну ккуни тумарин гьякьнаан учу гьязур гъапIу пландиинди, 507 гектариъ картфар, 559 гектариъ мейвйир, 528 гектариъ гъяжибугъда, 78 гектариъ гизаф йисарин укIар, 33 гектариъ нимкъар, 38 гектариъ гъарпзар ва 10 гектариъ бахчайин культурйир кивуз планламиш дапIнача»,
– гъапну райондин кIулин агрономди.
Хив райондиъ гъягъюрайи хьадукран гъулан мяишатдин ляхнарикан райондин жиларин гюзчивал гъабхру, жиларихъди аьлакьа айи ляхнарин ва гъулан мяишатдин управлениейин начальникдин заместитель Султан Аваевди мялуматар тувну. Дугъу гъапиганси, цци райондиъ 2332 гектариъ тумар урзуз РД-йин гъулан мяишатдин ва ипIру-убхъру сурсатарин Министерствойиан планламиш дапIна. Улупнайи кьадар хутIларикан 75 гектариъ мух, 60 гектариъ гаргар, 120 гектариъ картфар дурзна. Гъийин йигъаз тумар урзбан ляхнар давам шули ими.
Къайд апIуб лазим вуки, республикайиъ артмиш апIурайи тIумутIчивлизна багъманчивализ гьюкуматдин терефнаанра субсидйир жюрейиинди кюмек тувра.
