Наргиз Гюлечова

Дагъустандин меркездин кючйириъ маршрутдин линйириъди гъягъюрайи жямяаьтлугъ транспортдин кьадар йигълан-йигъаз артухъ шула. Ккудубшу йисан шагьрин игьтияжар гьуркIбан бадали, Мягьячгъалайин администрацияйи, 84 цIийи автобус масу гъадагъну, шагьрин кючйириъ лихуз деетнийи. Думу ляхин ццира давам апIуз кка.

 

Улихьна йигъари Мягьячгъалайин администрацияйин кIулиъ айи Жамбулат Салавовдин регьберваликкди «Сабвуйи Урусат» партияйин «Халкьдин программа» уьмриз кечирмиш апIбан серенжемдин дахилнаъди «Рягьят уьмур» рабочий дестейин заседание кIули гъубшну. Думу заседаниейиъ меркездин главайи гьаму йисан Мягьячгъалайин кючйириъ маршрутдин линйириъди гъягъру 141 деврин тIалабариз жаваб туврайи автобусар масу гъадагъурайиваликан мялум гъапIнийи. Салавовдин гафариинди, улупнайи кьадар жямяаьтлугъ транспорт масу гъадабгъбан бадали, меркездин администрацияйи «Жямяаьтлугъ транспортдин артмиш’вал» ва «Транспортдин гъурулушдин артмиш’вал» федеральный 2 программайиз аьрзйир тувна. Кьюбиб программйириъра аьрзйир кьабул гъапIну. Натижайиъ Мягьячгъалайин транспортдин парк 36 аьхю ва 105 кьялан жюрейин автобусариинди артухъ хьибди. Думу автобусар меркездин 10 маршрутдин линйириъди гъягъюз хъюгъди.

«Му Мягьячгъала шагьриз муганаз дархьибси гьядиса хьибди. 141 таза автобус шагьрин кючйириъ лихуз хъюгъган, инсанар гъахбан ери за хьибди, автобусарин арйириъ шлу вахтра цIиб хьибди. Автобусар Учхоз, Семендер, Эльтав, Пальмира, ЦIийи Хушет, ЦIийи Кяхулай ва Турали микрорайонариз деетиди», – къайд гъапIну Жамбулат Салавовди.