Вари Урусатдин халкьариз Гъалибвалин 75 йис аьхю аьшкьниинди ва иштагьвалиинди къаршуламиш апIуз ккунди айи. Амма коронавирусдин тIягъвни хайлин ихь ужудар ниятар, кьастар, планар кьяляхъ йивура.
Гьаци вушра, ухьу дидкан кIваълан гьархри, гъирагъдиъ гъузри адархьа. Хайлин ихь ватанагьлийири ярхла манзилнаъди вуйи гъалибвалин дарсар тувра. Янаки, ихь Дагъустан халкьдин лайикьлу ва бажаранлу шаирари, культурайин ва театрин гъуллугъчйири ва хайлин жара касари, Гъалибваликан шиърар, эсерар, дявдин кагъзар урхури, сягьнайиин дивнайи пьесйириан кьатIар улупури, «Фикриъ ихь Гъалибвал», «КIваин илмийихь», «Библионочь – 2020», «Онлайн-марафон», проектариъ иштирак шули, интернетдиъ ва социалин сетариъ тялукь ляхин гъабхури, тамашичйирик юкIв капIра.
Шагьрариъ, районариъ, гъулариъ дявдин иштиракчйирихьна, далу терефнан зегьметкешарихьна хулариз гъягъюри, Гъалибвалин 75 йис тебрик апIури, медалар, пулин дакьатар айи конвертар, хулар-йишварин сертификатар тувра.
Гьаму йигъари Хив райондиъра саб жерге серенжемар кIули гъягъюра. Гьяйифки, гъи райондиъ саркьан дявдин иштиракчи чIивиди амдар. Хъа дурарин ачIни духьнайи хпариз – Гъвандккарин гъул`ан вуйи Зарият Агъамирзаевайиз, ЦIийи Фрюгъярин гъул`ан вуйи Тамум Мисрихановайиз, учв Хив райондин глава Ярмет Ярметов кIулиъ ади, администрацияйин гъуллугъчйири хал-йишв гъадабгъуз пулин сертификатар тувну ва улубкьурайи 9-пи Майин машквар марцци кIваан тебрик гъапIну.
Гъи вари дюн`я читин гьялнаъ айивализ лигну, Хив райондин администрацияйин, образованиейин, культурайин идарйирин, райбольницайин, ЦСОН-дин, туканарин, аптекйирин терефнаан, гъулариъ яшлу касар яшамиш шулайи хулариз гъягъюри, волонтерари ва тялукь идарйирин гъуллугъчйири гьам хулар марцц апIури, гьам тукандиан хру лазим вуйи сурсатариз, гьам аптекайиан хру рубар-дармнариз ва хайлин жара ляхнар-карариз кюмекар тувра.
Гьелбетда, Хив райондиан Ватандин Аьхю дявдиз гъушу 1800-тIан зина эскрарин, далу терефнааъ зегьмет гъизигдарин бурж ухьхьан бабкан духьну – дукIну гъягъяйиз ктипуз даршул. Улупнайи кьадарнакан Ватан уьбхюз гюллдихь мухур гьиву эскрарин 1100-дихьна касар кьяляхъ гъафундар. Чпикан саб хабарра имдарди гъудургу 50-тIан артухъ эскрарин тарих ва дурар кивну сикин дапIнайи йишвар Ляхлаарин кьялан мектебдин тарихнан дарсар киврайи мялим, шаир, ватанперес, ТОКС-дин гъуллугъчи Маллакерим Маллаевдин кюмекниинди мялум гъабхьну. Чухсагъул чаз!
Гьюрматлу ватанагьлийир, ухь`ин жан илимбукьан гагьди, 1418 йигъан ва йишван ихь Советарин Армияйи цIин ва гюллдин ялавнаккди гъазанмиш гъапIу Гъалибвал гьарган марцциди ихь фикриъ уьбхидихьа!
Ухьуз му алтIабгнайи укIу зав, аку жил, аба-баб, бай-риш, чIал, хал-руг, вари жюрейин ва бабатнан нази-ниъмат айи ширин дюн`я багъиш гъапIу абйир-бабар саб дакьикьайин арайиъкьан кIваълан гьархиш, Ватанди чан руг, бабу – чан никк гьялал дарапIур. ФужкIа кIваълан гьархидархьа, фукIа кIваълан гьапIидархьа! Дурариз бахш дапIнайи ядиграр цIийи алаури, дурарин накьвар уликк уьрхюри, гьарган марцци фикриъ ади, гьар сяаьтна, гьар дакьикьайиъ дурарин лайикьлу ччвурариз чухсагъул пидихьа ва икрам апIидихьа.
Узуз йиз макьалайин аьхириъ шаир, мялим ва эскер И. Шагьмардановдин гафар кIваина хуз ккундузуз:
КIваин илмийиз, илмийиз…
Ухьу гъибтнура ккун кIваин,
Сарун рякъ тутрувуз дявдиз,
Сарун дяви дархьуз жил`ин.
Гъит, ихь шаири гъапиганси, сарун дявдиз рякъ тутрувуз ухьуз кьувват ва мюгькам сагъ`вал туври! Му гъати дявдикан ухьуз абйирин гафариан ебхьурашра, шиклариан, кинофильмариан дидин суратар рякъюрашра, ухьуз улариинди думу зат дярябкъри, я кьисматра дарибшри!
