Наргиз Гюлечова
19-пи феврали «Табасарандин нурар» газатдин редакцияйиъ бабан чIаларин ва Ватан уьбхру эскрарин йигъариз бахш дапIнайи серенжем кIули гъубшну. Душваъ РД-йин писателарин Союздин председателин заместитель Сувайнат Кюребегова ва жара табасаран шаирар, Каспийск шагьрин мектебариъ табасаран чIалнан дарсар киврайи мялимар ва баяр-шубар, ДГПУ-йин студентар, хусуси метлеб айи дявдин операцияйиъ игитариси жанар фида гъапIу Наврузбег Самурхановдин ва Асланбег Закировдин уьмрин юлдшар – Маринат Самурханова ва Муминат Закирова иштирак гъахьну.
Серенжем газатдин кIулин редактор Гюлягьмад Маллялиевди ачмиш гъапIнийи. «Учу кьюб машквар – Варихалкьарин бабан чIаларин йигъ ва Ватан уьбхрурин йигъ – саб серенжемдиъ гъи сатIи гъапIунча. Уччвуди фикир гъапIиш, дурар сигъ аьлакьайиъра а – ватан уьбхру эскрари жуван халкь, дидин культура, бабан чIал ва азадвал бадали женг гъабхуру. Ватан ва чIал – инсандихьан жара апIуз даршлу савкьатар ву. Гъи бабан чIал киврайи мялимари, саб шакра адарди пуз шулу, гележегдиъ Ватан уьрхру эскрар – халис ватанперверар гьязур апIура. Гьаз гъапиш, чIалнан ширинвалихъди бицIидари Ватандин ширинвалра гьисс апIура».
Табасаран райондин Къужник гъул’ан дуфнайи шаир Рамазан Рамазановди чав эскрариз дидикIнайи шиърарикан ва, дурариз багъиш апIуз кIури, урус чIалниинди чапдиан адабгъу «КIван дих» кIуру китабдикан хабар тувнийи. Сувайнат Кюребеговайи гъи Дагъустандин писателарин союзди хусуси метлеб айи дявдин операцияйиъ айидариз чпи фициб кюмек тувраш, ктибтнийи. Гьаци, цци Урусатдин Игит Нурмягьямед Гьяжимягьмедовдин ччвурнахъ хъайи Мягьячгъалайин 54-пи нумрайин мектебдиъ Вариурусатдин «Урусатдин писателари фронтдиз» акция кIули гъубхьну.
Му ватанпервервалин серенжемдиъ Урусатдин писателарин союздин председатель Николай Ивановра, республикайин правительствойин ва Халкьдин Собраниейин вакилар иштирак гъахьну. Мектебдиъ кIули гъубшу мяракайиъ кьюб китабдин презентацйирра кIули гъухну. «Сабпи китаб Москвайиъ чапдиан удубчIвнайи ва хусуси метлеб айи дявдин операцияйин иштиракчйириз бахш дапIнайи поэзияйин «За други своя» антология вуйи. Дидик Багьаутдин Митаровдиз бахш дапIнайи йиз шиирра тувна. Хъа кьюбпи китаб «Дагъустандин писателари фронтдиз» – Дагъустандин писателарин союздин председатель Марина Агьмедовайи Расул Гьямзатовдин ватанпервервалин эсерарикан уч дапIнайи гъварч ву. Кьюбиб китабарра фронтдиз хътаъну. Дагъустандиъ ачмиш гъапIу акция, цIиб вахтналан Астрахандиъра кIули гъубшну.
Гьамусяаьт Дагъустандин писателарин союздиъ СВО-йин иштиракчи дагъустанлуйириз бахш вуди, республикайин вари миллетарин шаирарин шиърар урус чIалназ таржума дапIну, сабсан китаб гьязур апIура», – гъапну Сувайнат Кюребеговайи.
Бабан чIалариз ва Ватан уьбхру эскрарин йигъариз бахш вуди, серенжемдиъ иштирак духьнайи баяр-шубари ватандикан, бабан чIалнакан шиърара гъурхну. Мялимари, чпи мектебдиъ баяр-шубарихъди бабан чIалнан дарсариъ гъабхурайи ляхникан, хъа Маринат Самурхановайи ва Муминат Закировайи чпиз айи читинваларикан, уьмрин юлдшар адарди бицIидар тербияламиш апIуз алахьурайи гъагъишнарикан ктибтбнийи. Уч духьнайидари дурариз сабур тувнийи ва ширин сюгьбатнаъ дурарин юкIвар улдучнийи.
