Умгьанат Сулейманова

«Дада адарш, игитра, шаирра адар». Му гафарин мяна деринуб ву. Дурариъ дадайихьна дубхьну ккуни гьюрмат улупура. Фукьан айкIан дадйир, чпин веледариин шадди вуйидар, хъа фукьан – юкIвар дургнайидар?

 
Дупну ккундуки, Украинайиъ гъябгъюрайи хусуси метлеб айи дявдин операцияйиъ фукьан сагъи, мюгькам сагъвал айи баяр, дийихнайи йишвкьан аьгъдарди, дудургна. Гьадму дадйирира чпин эвлемиш хьуз имбу жигьил баярин уьмриъ сумчир хьуваликан, хутлар рякъбакан хиялар апIурашул. Дураризра аьдати инсандин бахт рябкъюз ккундаринхъа? Думу дадйирира чпиз чпин веледар даягъ шлувалик, чпин кьабивалик дурари мани цIюмгълар кирчувалик умуд кивну гъахьуншул. Амма дурарин кьисмат жараси илтIибкIну. Украинайиъ кIули гъябгъюрайи спецоперацияйиъ женгнан месэлйир тамам апIурайи вахтна кьягьялвал ва гьунарар улупу жигьилар ва чпин жанар фида гъапIу ватанагьлийир гъи хайлин а. Гьадрарикан сар, аьхюну сержант Седиров Насир Зубаилович ву. 2025-пи йисан 29-пи июлиъ гвачIнинган Дербент шагьриъ яшамиш шулайи Седироварин хизандиз чIуру хабар кубкIру. Жвуван халкь, Ватан бадали намуслувалиинди чан эскервалин буржи тамам апIурайи, ихь чвевалин республикйир нацистарихьан азад апIурайи Седиров Насир Зубаиловичди чан жан фида апIуру.

 
Седироварин хизандиъ Зубаили ва Шамсиятди, шубур велед аьхю дапIну, тербияламиш гъапIну. Дурарин кьюрид баяр – Расим ва Насир, аьхю насларин аьдатар давам апIури, Украинайиъ кIули гъябгъюрайи хусуси метлеб айи дявдин операцияйиъ иштирак шулайи. «Гюлле, наанди гъитIибхишра, гьарган дадайин кIвак кубкIру». Думу хабар кубкIу Насирин дада Шамсият гьамусра, бай уьмриан гъушну кIури, хъугъри адар. Шамсиятди, чан бай кIваин апIури, гьамци гъапну: «Йиз Насир шаду мяракйир ккуни бай вуйиз. Варидарихъди аьлакьа айи бализ ихь табасаран театрин актерар ва мяълийирин устадар вари танишди вуйи. Узу тIалаб дапIну, ихь табасаран мяълийириз гафар дикIурайи Мафират Салиховайи «Балин дерд» кIуру мяълийин гафар гъибикIну.

 
Насири 17-пи мектеб ккудубкIну Дербент шагьриъ ерлемиш дубхьнайи эканомикайин ва упраленияйин училищейик урхуз кучIвру. Училище ккудубкIбан кьяляхъ, 2017-пи йисан армияйиз гъягъюру, ва Москвайиъ чав гъуллугъ апIурайи частнаъ контракт йибтIуру. Шубуд йисан душваъ лихури, батальондин командирин заместителин гъуллугъниина за гъахьну. 2020-пи йисан душв’ан удучIвну, Каспийск шагьриъ полицияйиъ ляхниъ учIвру. 2022-пи йисан Украинайиъ хусуси метлеб айи дявдин операция ккебгъган, Насир, дишла полицияйин ляхниан удучIвну, Оборонайин Министерствойин Санкт-Петербургдиъ ерлемиш дубхьнайи частнаъ контрактдин къайдайиинди гъуллугъ апIуз йикьрар йитIуру. СВО ккебгъу йигъланмина душваъ иштирак шулайи Насири, дада, фици вува, кIури гьар йигъан зенг апIуйи. «Луганск ва Донецк областдин ругариин алжагъурайи ВСУ-йин нацистарихьан ихь ругар уьрхюрача. Ич вазифа дурар дерккуб ву. Гъийин деврин дявдиъ варитIан жинжал ва къурхуллу яракь дронар ву. Дурар, увузра хабар дарди, яв кIул’ин дийигънади шулу. Дурариз дярякъру йишвахьинди гьитIикIну ккунду, – пуз даккундиси гъапну Насири. – Нагагь узуз фукIара гъабхьиш, дада, лиг, гъагъи сир кIваъ ивну яшамиш махьан. Йип, бай игитси гъушну, кIури.

 
«Дагъустан халкьдин Игит» ччвурра тувнайи думу хъана хайлин медаларихъди лишанлу дапIнайи. Насир дукIну сад йис ву, амма «Кьягьялвалин Орден» гьамусра тувну адар.

 
Аьхюну бай Расимра военный вуйиз. Дербент шагьриъ ерлемиш дубхьнайи 17-пи нумрайин мектеб ккудубкIну, думура эканомика ва управления училищейик урхуз кучIвру. Сабпи курс очно дурхну, хъасин заочно удучIвуру. Ва 2013-пи йисан РФ-йин Яракьлу Къувватариъ гъуллугъ апIуз гъягъюру. Армияйан гъафи Расимди чан урхурайиб давам дапIну, Калугайиъ Россгвардияйихъди контрак йибтIуру. Думура СВО-йиъ сабпи йигъланмина айир ву. Дугъазра «Дагъустан халкьдин Игит» ччвур тувну, жара наградйирра а. Дугъаз кьюр риш айиз. Жилирра хайлин йисари Дербент шагьриъ МВД-йиъ гъилихур вуйиз. Гьамусяаьтна думу пенсияйиъ а. Йиз кьисмат гьамциб гъабхьну, йиз жилир Зубаили, баяр Расимди ва Насири, язна Рамили уьмрин рякъ вуди Ватандиз гъуллугъ апIувал ктабгъну».