Наргиз Гюлечова
Улихьна йигъари Москва шагьриъ Урусатдиъ хьайин рынок артмиш апIру идарйирин арайиъ вуйи штабдин заседание гъабхьну. Думу заседание Совет Федерацияйин председателин сарпи заместитель Андрей Яцкиндин регьберваликкди кIули гъубшнийи.

Заседаниейин иштракчйир циркил лап кIваантIан хъюгъну артмиш апIбан, хьайикан гьясил апIурайи шей’арин ери за апIбан ва гьюкуматдин терефнаан туврайи кюмекнан месэлйирикан гъулхнийи.
Серенжемдиъ Дагъустандиан республикайин вице-премьерин вазифйир вахтназди тамам апIурайи Ризван Гьязимягьямедов айи. Дугъу, Урусатдиъ гизаф чарвйир уьрхюрайи регионарин арайиъ, Дагъустандиъ варитIан гизаф кьадар хьа (15,7 агъзур тонна) гьясил апIуз планлариъ айиваликан мялум гъапIну.

 
Ризван Гьазимягьямедовдин гафариинди, ккудубшу йисан Дагъустандиъ 14 агъзурна гьацIтIан артухъ тоннайин хьа гьясил гъапIну, хъа 2027-пи йисаз вуйи планариинди гьясил апIру хьайин кьадар 16,2 агъзур тоннайиина за апIуз кка.
«Гьамусяаьтна республикайин хьайихъди ляхин апIурайи цирклиъ 8 кархана иштирак шулайи кластер тешкил дапIна. Думу кластериз 343,6 миллион манатдин инвестицйир жалб дапIна ва гележегдиъ 147 лихру йишвар ачмиш апIуз планариъ а. Иштирак шулдайи карханйириз льготйирра тувра ва хьайин гьясиллувал артмиш апIуз 84,2 миллион манат жара дапIна», – гъапну Ризван Гьазимягьямедовди.

 
Дупну ккундуки, гъийин йигъаз дагъустандин хьайикан шей’арра гьясил апIура. Магьан цци «Кавказдин хьа» ООО-йи мектебариъ урхурайи баяр-шубари алахьру 13,6 агъзур пенжек гъидирхну. Гьадрарикан 10 агъзур масу тувну ва хъанара 35 агъзурихьнакьан пенжкар дирхуз аьрза тувна. Мидланра гъайри, му карханайиъ 12 агъзур хьа гъяйи леъфарра дидирхна.