Гюльнара Мягьямедова
15-пи сентябри Мягьячгъалайиъ Урусатдин халкьарин йисаз ва Дагъустандин халкьарин сабвалин йигъаз бахш вуйи шадлугънан серенжемар кIули гъушну. Мягьячгъалайин кьялан майдандиин ккатIабццнайи сягьнайилан Урусатдин Федерацияйин Федеральный Собраниейин Федерацияйин Советдин председатель Валентина Матвиенко ва Дагъустандин главайин вазифйир вахтназди тамам апIурайи Федор Щукин республикайин агьалйирихьна илтIикIнийи.

Валентина Матвиенкойи къайд гъапIганси, Дагъустандин халкьарин сабвалин йигъ – му, республикайинси, вари Урусатдин мяна айи машквар ву. Урусатдин Федерацияйин Президент Владимир Путинди Урусатдин халкьарин сабвалин йис вуди мялум дапIнайи йисан думу машквран йигъ хъана артухъ лишанлу шула. «Дагъустан жюрбежюр культурйир сатIи шулайи йишв ва тарихдин хазна ву, кьягьял, зигьимлу, лайикьлу инсанарин макан ву. Республикайин агьалйир яшлуйирихьна айи гьюрматну, аьдатарихьна ужуди янашмиш хьували, рягьимлували ва Ватандин кьисматнахъан юкIв убгурайивали сатIи апIура. Урусат, дюн’яйиъ чIатху уьлкйирикан саб вуйиси, халкьарин варитIан албагу хизанра ву», – гъапнийи Федерацияйин Советдин спикери.

Дугъу республикайин агьалйири Урусат мюгькам апIбак ва думу уьбхбак киврайи пайнаканра хъайи-хъайиси гъапнийи. Валентина Матвиенкойи Дагъустандин агьалйири Ватандин Аьхю дявдин йисари улупу гьунарарикан, региондиъ 1999-пи йисан варихалкьарин террористарин дестйир архьиган улупу халкьарин дирбаш’валикан, гьамусяаьт хусуси метлеб айи дявдин операцияйиъ иштирак шулайидарин игитваликан гъапнийи. Дугъу ветеранариз, дявдин гъуллугънаъ айидариз чухсагъул мялум гъапIнийи.
Федерацияйин Советдин спикери гьаму йисан республикайиъ аьхю мархьар гъургъган гъахьи зарарикан, уьлкейин гизаф регионариан кюмекнан хил гьачIабккбаканра гъапнийи. Дугъан гафариинди, Федор Щукиндин жигьил ва кьудратлу дестейи думуган зарар гъабхьи хулар-йишвар, яшайишдин дараматар гьяракатниинди цIийи алаура.

 
Валентина Матвиенкойи къайд гъапIганси, чпин бицIи Ватандихьна вуйи ккунивал, ата-бабйирин ирснахьна вуйи гьюрмат ва Дагъустандин гележегдихъан жавабдарвал республикайин гележегдин артмиш’валин бина хьибди. Дугъу региондин гьар йигъандин месэлйир ужуди гьял апIурайи, пишекарвалин дикъат фикир туврайи Федор Щукинди идара апIурайи дестейиз хъуркьувалар ккун гъапIну.

 
«Дагъустанди республикайин сабвал ва уьлкейин сабвал жа-жаради гьисаб апIурадар. Сабвалин кьимат аьгъячуз. Гъи дагъустанлуйири хусуси метлеб айи дявдин операция гъябгъюрайи йишваъ Ватандин маракьар уьрхюра, агъзрариинди агьалйири фронтдиз, эскрариз ва дурарин хизанариз кюмек тувра. Думу сабвал чIивиб ва гьякьлуб ву. Сабвал уьбхюб Дагъустандиз ва ихь уртахъ Ватан Урусатдиз хъайивал апIуб ву», – аьлава гъапIнийи Федор Щукинди.

 
Республикайин кIулиъ айири шадлугънан серенжемариъ иштирак хьпаз, республикайиз фикир туврайивализ Урусатдин Федерацияйин Федеральный Собраниейин Федерацияйин Советдин Председатель Валентина Матвиенкойиз чухсагъул гъапнийи. «Валентина Ивановна, учухъди гьаму машквар къайд апIбаз увуз чухсагъул. Дагъустандикан ва дагъустанлуйирикан гъапIу ужудар гафаризра чухсагъул», – текрар гъапIнийи Федор Щукинди.

 
Машквран йигъан меркездин кьялан майдандиин вари миллетарин, пишйирин ва гъуллугъарин вакилар уч гъахьнийи. Дурар вари багъри ругар ккунивали, аьдатариз гьюрмат айивали сатIи дапIнайидар вуйи .

Машквран серенжемар уч духьнайи агьалйириз ва дуфнайи хялариз концертдин программа улупбиинди ва салютар деетбиинди ккудубкIнийи.