Зубайдат Шябанова
Мартдин 20-пи йигъан Табасаран райондин Ярса гъулаъ хьадукран машквар Эбелцан къайд гъапну.
Аьдатнаъ абхънайиганси, му машквар хьадукар улубкьурайивалихъди, табиаьт ачмиш шулайивалихъди, гъулан мяишатдин ляхнар ккергъуз вахт дуфнайивалихъди аьлакьалу ву.
Ярса гъулаъ эбелцнан машквран серенжемариъ чпин ва багахь гъуларин агьалйир, мектебариъ урхурайидар иштирак гъахьну. Ярса гъулан мектебдиъ урхурайидари, Ярса, Дарвагъ, Зиль гъуларин культурайин хуларин гъуллугъчйири, табасаран эстрадайин артистари ва Табасаран райондин культурайин управлениейин халкьдин мукьмар йивру алатарин ансамбли машквраз маракьлу концертдин программара гьязур гъапIнийи.
Уч духьнайидар райондин культурайин управлениейин кIулиъ айи Аьбдулвагьаб Аьбдуловди машкврахъди тебрик гъапIну. Хъа машквран тарихдикан, хайлин уьлкйирин халкьарин милли культура сатIи апIурайи аьдатарикан педагогикайин зегьметнан ветеран Муса Мусаевди ктибтну. Машквран аьхириъ, аьдат вуйиганси, Эбелцнан цIа кабхьну.
