Зубайдат Шябанова

Сентябрин 18-20-пи йигъари Казань шагьриъ Москвайин илимдинна гьясиллувалин «Эндомедиум» тешкилатди вариурусатдин «ГистероМастер 2026» ччвур тувнайи дишагьлийирин уьзрарин хирургияйин тажрубайин сабпи форум тешкил гъапIну. Думу пишекрарин форумдиз вари уьлкейиан машгьур гинекологар ва эндоскопический хирургар уч гъахьну. Серенжемдин дахилнаъди «ГистероМастер 2026» конкурсра кIули гъубхнийи. 

Конкурсдиъ ихь ватанагьли, Дербент шагьрин «Здоровье» сагъламвалин центрин духтир-гинеколог, онколог ва маммолог Камилла Таримирзаевна Бедирхановайи сабпи йишв гъазанмиш гъапIну. Ихь ватанагьли, конкурсдиъ чахъди иштирак шулайи вари уьлкейин бажаранлу 13 духтрин улихь гьудучIвну, Урусатдин варитIан ужудар духтрарин сиягьдик кахъну. 

«Дюзди гъапиш, йиз му конкурсдиъ гъалиб шлувалигъали бвалик миж ктайиз. Фицики мициб дережайин конкурсариъ, аьдат вуйиганси, аьхю шагьрариъ цIийи деврин алатар айи федеральный чIатху центрариъ лихурайи докторар гъалиб шулу», – кIура ич сюгьбатнаъ. Камилла Бедирхановайи. 

Камилла Бедирханова «Здоровье» центриъ 2017-пи йисхъанмина лихура. Дугъан ад вари кьибла Дагъустан вуйибси тарабгъна. Гьамусяаьтра дугъу, Дербент шагьрианси, кьибла районарианра чахьна гъюрайи дишагьлйириз кюмек тувра. Конкурсдиъ дугъу гистероскопический техникайин кюмекниинди сабтIан саб гъагъи шубуб операция гъухну. Гистероскопия – му операция апIру вахтна бедендинлиъ цIибди дадабтIну, дишагьлийирин маткайин айитIиш'варин уьзрар ва чIуру дигишвалар хусуси алатдин – гистероскопдин – кюмекниинди ахтармиш апIувал ву. Гистероскоп кIуру аппарат камера кибтIнайи, тувру айи ва бедендин шмишин уч апIру канал айи ккуру трубкайиз кIуру. 

Камилла Бедирхановайи кIули гъубху сабуну операцияйин натижайиин вари уч духьнайидар мюгьтал гъахьну. «Читинвалар гъахьундар, вари ужуди кIули гъубшну», – гъапнийи духтри, гьациб операция 6 ваз улихьна гъубхиган. Гьадму операцияйин кьяляхъ 6 вазлилан 7 йисан веледар даршулайи хизандин вакилариз чпи адашна дада шлуваликан мялум гъабхьну. 

Камилла Бедирхановайи, 2013-пи йисан Дагъустандин гьюкуматдин медицинайин университет ккудубкIхъанмина, зат яваш дарди чан пишекарвалин дережа за апIура. 2014-2017-пи йисари думу Астраханский областдин онкологический диспансериъ онколог-гинеколог духтирди лихури гъахьну. Гъи дугъаз дишагьлйирин уьзрар сагъ апIбаан ва операцйир гъахбаан ужуб тажруба а. Хъа пишекарвалин заан дережайин аьгъювалариз ва тажрубайиз ва гьацира конкурсдиъ гъалиб хьпаз лигну, Камилла Бедирхановайиз 2027-пи йисан гъабхру Урусатдин «ГистероМастер 2027» форумдиъ спикер (доклад урхрур) хьуз теклиф дивна. 

Сюгьбатнан аьхириъ Камилла Бедирхановайи духтирвалин пишейиъ тазади гамар алдагъурайи гъарашугъариз теклифар ва насигьятар тувнийи. 

«Гьарсар кас чав ктабгъурайи пишейихьна жавабдарвалиинди янашмиш духьну ккунду. Духтирвалин пише, дидихъ ичв кIваантIан юкIв хъаштIан макадабгъанай. Фунуб вушра ляхниъ читинвалар алахьуру, гьадму гьисабнаан медицинайиъра. Рази дару ва увина ихтибарвал дарапIрайи пациентар, операцйирин кьяляхъ гъагъи дюшюшар, гъабхурайи лечениейиз аьзарлуйиз тясир дарапIрайивал, руководствойин терефнаан наразивалар ва хайлин дюшюшар шулу. Узу узкан ваъ, вари медицинайин циркликан улхураза. Ва анжагъ чан ляхин кIваантIан ккуни касдихьантIан аьшкьниинди думу тамам апIуз шулдар. Гьаци дарш, инсан гьадму пишейиъ дургуру», – гъапнийи Камилла Бедирхановайи. Хъа гьаму гафари дугъан пишекарвалин рякъюъ гъабхурайи баркаллу ляхнихьна вуйи ккунивал улупура.