Наргиз Гюлечова

Улихьна йигъари Дагъустандин Жямяаьтлугъ палатайи бабан чIал уьбхбаз ва артмиш апIбаз бахш вуйи серенжем кIули гъубхну. Дина гьюкмин органарин вакилар, бабан чIал’инди чап апIурайи газатар-журналарин редакторар, мялимар ва хайлин жара касар дуфнайи. 

Серенжем ачмиш апIури, Жямяаьтлугъ палатайин председатель Амирхан Мягьямаддадаевди, халкьдин тарих ва культура уьбхбаъ бабан чIалну аьхю йишв бисурайиваликан гъапну ва Государственный Думайин депутат Энвер Набиевдихьан вуйи кагъаз гъурхну. Кагъзиъ дибикIнайибдиз асас, гъи чIалар лап читин гьялнаъ а ва аргъаж шулайи наслариз чIал улупуз хъанара гъагъиди алабхъура. Депутатдин фикриинди, му ляхниъ асас роль уйнамиш дапIну ккунидар милли чIалариинди чап апIурайи газатарин редакторар ву.
Бабан чIал уьбхбан ва артмиш апIбан бадали фицдар рякъяр дагну ккундуш, РД-йин халкьарин бабан чIалар уьрхбанна артмиш апIбан ва культурайин фонднан президент Аьли Камаловди доклад гъурхнийи.

 
Сережемдиъ иштирак шулайидарикан гьарури гъитlибккнайи месэлайин гьякьнаан чан фикрар ачухъ апIурайи. РГВК «Дагъустан» телеканалин директор Камила Гьямзатовайи гъапиганси, аьхиримжи вахтари Урусатдиъ гъадагъа дапIнайи социальный сетариъ машгьур блогерари бабан чIалариинди гафар апIбан аьдат ипра. Йиз фикриан, чIал дубгъуз ккуни касариз гьадмура лап аьхю кюмек ву. Мисал вуди гъадабгъиш, сар табасаран блогер шуру ихь чIалниинди гьаммишан люкьнар апIури шулу. Хъа люкьнар, ухьуз аьгъюганси, халкьдин фольклорин кюгьне пай ву.

 
Сарсана табасаран шуру, бабан чIал’инди улхури, хурагар гьязур апIуру. Дугъан кюмекниинди подписчикари хурагарик каънайи сурсатарин ччвурар дургъура. Гьамцдар мисалар фукьан вушра хуз шулу.
Серенжемдиъ гъи бабан чIалариинди улхуз ва бикIуз ккуни жигьилар телевидениейиз ва милли чIалариинди удучIвурайи газатариз пишекрарди дяргъюрайиваликанра гъапнийи.

 
ДГУ-йин журналистикайин кафедрайин заведующий Гьямид Мягьямедовди мялум гъапIганси, университетдиъ журналистар гьязур апIбан бадали, бюджетдин йишвар туврадар. Хъа университетдин филологияйин факультетдин декан Муса Бягьямедовдин гафариинди, гьамусяаьт бабан чIалар киврайи отделениейин гьял лапра читинуб ву: цци табасаран, лак ва гъумугъ чIаларин группйириз гьич саркьан кас гъафундар.
Серенжемдиъ иштирак гъахьидари чпин фикрар ачухъ апIбан кьяляхъ, варидарин теклифар атIагну, региондин къанунар адагъувалин анализ дапIну, Дагъустандин чIаларин гьякьнаан вуйи къанун адабгъбан месэла гъитIибккнайи проект гьязур гъапIну.