Гьямзат ЦIадаса бабкан духьну 150 йис къайд апIиди
Наргиз Гюлечова
Дагъустандин Правительствойин председатель Мягьямед Рамазановди, авар халкьдин машгьур шаир Гьямзат ЦIадаса бабкан духьну 150 йис къайд апIбан серенжемарихьна гьязурлугвалар гъахру тешкиллувалин комитет арайиз хпан гьякьнаан къарар адабгъну. Тялукь документ республикайин правительствойин сайтдиъ тувна.
Шаирин 150 йисандин серенжемарихьна гьязурлугвалар гъахру тешкиллувалин комитетдиз Мягьямед Рамазановди, тешкиллувалин комитетдин ляхнин план гьязур дапIну, тасдикь апIуз табшуругъ тувну. Гьадму ляхнариъ иштирак хьуз Хунзах райондин администрацияйизра теклиф дивна.
Тешкиллувалин комитетдин сиягьнаъ гъахру серенжемарихъди аьлакьалувал айи министерствйир ва ведомствйирин кIулиъ айидар, культурайинна илмин идарйирин вакилар, Дагъустандин писателарин союз, Гьюкуматдин авар театр, Поэзияйин театр ва хъанара хайлин жарадар а.
Дагъустандин глава Федор Щукиндин указдиинди, Гьямзат ЦIадасайин бабкан духьну 150 йис хьувал гъюру йисан къайд апIиди.