Гюльнара Мягьямедова

Мягьячгъала шагьрин мэр Жамбулат Салавовди къанун уьбхру органарин гъуллугъчйир ва ветеранар РФ-дин айтIан ляхнарин органарин гъуллугъчйирин йигъахъди тебрик гъапIну.

Шадлугънан серенжемдиъ Жамбулат Салавовди шагьрин собраниейин депутатарин председатель Хиби Аьлиевдихъди ва РФ-дин МВД-йин Мягьячгъалайиъ айи Управлениейин начальник Нурмягьямад Муртазялиевдихъди полицияйин, лишанлу гъахьи, чпин зегьметниинди, пишекарвалиинди ва гъуллугънахьна жавабдарвалиинди янашмиш хьували гьюрмат за апIурайи гъуллугъчйирин ччвурар гъидиснийи.

 
Аммаки, серенжемдин варитIан асас гьядиса Дагъустандин меркездиъ къанун уьбхру органарин вакилариз яшайишдин кюмек тувуб гъабхьнийи. Уч духьнайидарин улихь удучIвну гъулху Жамбулат Салавовди мялумат тувганси, чав РД-йин айтIан ляхнарин министр Аьбдурашид Мягьямедовдихъди сатIиди лишанлу гъахьи гъуллугъчйириз гьар йисан шубуб квартира жара апIбан гьякьнаан къарар кьабул дапIнайиваликан гъапнийи. Гьаму къарарну гъуллугънаъ хъуркьувалар гъадагъуз, ерли агьалйирин хатIасузвал тямин апIбан ляхин гужли апIуз кюмек туврувалиин Мягьячгъалайин мэр шаклу дар.

Жамбулат Салавовди гьар йигъан къанундин гъаравлиъ айи, инсанарин саламатвал уьбхюрайи полицияйин вакилариз чав дериндиан гьюрмат апIурайивал къайд гъапIнийи.