Гюльнара Мягьямедова 

10-пи ноябри Дагъустандин глава Федор Щукинди Дагъустандиъ коррупцияйиз аьксивал улупру комиссияйин заседание гъубхну. Душваъ гьял гъапIу жара месэлйирихъди сабси, республикайиъ коррупцияйиз аькси ляхин гъабхбан комиссияйин къарарар тамам апIбазра гъилигнийи.

2026-пи йисан сабпи 6 вазлин улупбарин гьякьнаан РД-йин главайин гьюкуматдин гъуллугънан, кадрйирин ва коррупцияйиз аьксивал улупбан идарайин начальник Артем Гарковенкойи ктибтнийи. Гьаци, коррупцияйин къайдасузвалар апIбаз дилигну, гьюкмин органарин 74 гъуллугъчи намуснан ахлакьдин жавабдарвалихъна гъахну.

 
Гьюкуматдин ва муниципальный идарйирин кIулиъ айидар тяйин апIруган, хусуси делойир ахтармиш апIуру. Гьадму вахтна асас месэла гъазанжарикан дюз дару улупбар тувуз гъидритуб ва инсандин хусуси метлебари дюзди ляхин апIуз манигъвал тутрувуб ву.
Федор Щукинди идарйирин кIулиъ айидар гъядягъюб улихь дийибгънайи варитIан важиблу месэла вуйиваликан гъапну, фицики, дурари коллективар кIули духну, бюджетдин дакьатарихъан ва гьюкуматдин хусусиятнахъан жавабдарвал гъабхуру.

 
«Кандидатурйирин месэла гьял апIруган, улупнайи къайдйир тамам дапIнайивал ахтармиш апIуб лазим ву, гьадму гьисабнаъди коррупцияйиз аьксивал улупбан къанунарра. Тялукь идарайикан гьадму месэлайиз артухъси фикир тувуб ккун апIураза, фицики республикайин кIулиъ айидари коррупцияйиз аьксивал улупбан месэлйириз гьаммишан фикир тувди ва дицисдар ляхнарихъди женг гъабхиди», – гъапнийи Федор Щукинди.

 
Дагъустандин кIулиъ айири аьлава гъапIганси, йишвариин комиссияйин къарар тамам апIуб гъуху серенжемарикан мялуматар тувбиинди ккудубкIну ккундар. «Ухьуз гьякьлу натижа лазим ву: терг дапIнайи къайдасузвалар, къайдасузваларин улихь йишв бисувал ва гъуллугъариъ айи касарин жавабдарвал», – ккудубкIнийи чан улхуб Федор Щукинди.

 
Гьар ражари республикайин гьюкмин кIулиз цIийи кас гъафиган, инсанар дугъахьинди аьхю умуд кади лигуру. Коррупцияйиз аькси заседанйир гъахурайиваликан мялуматар тувруган, узура республикайиъ руш’ватар тувуб-гъадагъуб яваш шул, гьюкмин гъуллугъ жвуван хусуси девлет артухъ апIбаз илтIитIибкIру касар идарйирин кIулиз гъюр кIури, умуд кивуз ккун шулу. Йиз фикриинди, гьаму ляхин гьюкмин кIулиъ айидариканси, халкьдиканра асиллу ву. Ухьу, дагъустанлуйир, гизаф гьюрмат кайи, майил-мадатар ккун апIувал фикир дарди гъитуз даршлу халкьарикан вухьа. Гьаддиз республикайиъ айи аьгьвалат дигиш апIуз читинди ву. Хъа вушра миж ктабтIуз ккун шулдар.