Нариза ТIаибова
10-пи ноябри полицияйин гъуллугъчйирин пишекарвалин Хив райондин айтIан ляхнариз лигру отделиъ машкврахъди аьлакьалу серенжемар кIули гъушну.

Серенжемдиъ райондин глава Ярмет Ярметов, дугъан заместитель Мирзабег Багъичев, Хив ва Агъул районарин прокурор Мажид Велимурадов, РД-йин Хив райондиъ айи суддин председатель ТIаиб ТIаибов, полицияйин ветеранар иштирак гъахьну.
Шадлугънан серенжемдиз уч духьнайи хялар къаршуламиш апIури, Урусатдин Хив райондин ОМВД-йин начальник, полицияйин подполковник Тажир Тагъилаевди чпин гъуллугънан важиблуваликан, йишвариин жямяаьтлугъ хатIасузвал уьбхбан жигьатнаан полицияйин вакилари гъабхурайи ляхникан ктибтну.

 
– Улихьна вахтари полицияйин вакилар анжагъ кIулди тахсиркарваларихъди женгнаъ айиш, гъи айтIан ляхнариз лигру гъуллугъарин вакиларин иштирак’вал адарди гьич саб месэлара гьял шуладар. Фикир тувай: йишвариин агьалйири чпин чиркишнар лазим саягъниинди марцц апIбиинра кмиди учу гюзчивал гъабхуз мажбур шулача. Улупнайи месэла важиблубра ву, фицики хайлиндари марцццишин уьбхбахьна вижнасузвал улупура. Полицияйин гъуллугъчйири тялукь камивалариин ляхин гъабхура.
Шаксуз, жямяаьтлугъ хатIасузвал уьбхювал варидарин уьмуми месэла дубхьну ккунду. ОМВД-йи ляхин райондин администрацияйихъди, аьлавади агьалйирин игьтияжар гьуркIбан рякъюъ лихурайи саб жерге тешкилатарихъди, гьадму гьисабнаан акварин, газарин, яшайишдин месэлйириз лигурайи вакиларихъди сигъ аьлакьайиъди гъабхура. Тялукь саягъниинди ляхин ккабалгнайивали ухьуз натижйирра тувди.

 
Ав, полицияйин гъуллугъ рягьятиб дар. Амма рюгьнан ижмивали вари читинвалар намуслуди гьял апIуз кьувват туври аьдат ву. Машкврахъди сифте нубатнаъди гъуллугънан ветеранар тебрик апIуз ккундузуз. Учву учуз нумуна вучва. Ичв насигьятар ляхин заан дережайиъди гъабхбаз кюмек ву. Аферин гьарсариз! Ляхнин гъарашугъарихьна илтIикIури, пуз ккундузуз, гъит гъуллугънан гъагъ намуслуди гъабхбаъ гьарсариз хизан мюгькам далу ибшри! Ухькан гьарсариз жямяаьтлугъдин саламатвал уьбхбаъ сагъвал туври, – гъапну Тагъилаевди.

 
Серенжемдиъ удучIвну гъулху Хив райондин глава Ярмет Ярметовди ерли администрация полицияйин вакиларихъди фунуб вахтнара жямяаьтлугъ хатIасузвал ва сакитвал уьбхбаъ сигъ аьлакьайиъди зегьмет зигуз гьязур вуйивал субут гъапIну.
Аьдат вуйиси, шадлугънан серенжемдиъ намуслувалиинди ляхнин вазифйир тамам апIурайи саб жерге полицияйин гъуллугъчйир Дагъустандин МВД-йин, Хив райондин администрацияйин терефнаан гьюрматнан грамотйириинди ва «Гъуллугънаъ лишанлу хьпаз лигну» тялукь дережйирин медалариинди лишанлу гъапIну.

 
Му йигъан серенжемдин иштиракчйири гьацира полицияйин гъуллугъ намуслувалиинди тамам апIури уьмриан гъушу гъарашугъарра кIваина гъахну. ОМВД-йин начальник Тажир Тагъилаевдин жягьтлувалиинди машквран улихьна Хив ОМВД-йин гьяятдиъ жямяаьтлугъдин ислягь гележег бадали намуслувалиинди уьмриан гъушу чпин гъарашугъариз аллея тикмиш гъапIну ва дурарин ччвурар даима апIури, кIваинди уьрхбан тахта кебхну. Улхбарин аьхириъ дурарин гьюрмат уьбхюри, ОМВД-йин кIулиъ айири ва Хив райондин главайи Гьюрматнан аллея ачмиш гъапIну.