Наргиз Гюлечова
2025-пи йисхъан башламиш дапIну, Дагъустандиъ диврайи халачйирин цIийи фабрикайин тикилишчивалин ляхнар саки аьхирихъна гъюра кIури, республикайин промышленностдин министерствойин пресс-гъуллугънаан хабар тувра. Му фабрика «Уйташ» индустриальный паркдин аьтрафарин 5 гектар жилиин тикмиш апIурайб ву. Дидин инвестор «ДТЭКС» ООО компания ву. 

Министерствойиан вуйи мялуматариинди, сад йисандин арайиъ проектдин инвестори тикилиш’валин ляхнар вари ккудукIну ва му вари объект рякъюхъди, акварихъри, штухъди – яна лазим вуйи вари инфраструктурайихъди тямин гъапIну.
Фабрика тикмиш апIуз удучIвурайи харжар 1,2 миллиард манат ву, душваъ 150 лихру йишвар ачмиш апIиди.
Проектдиз жара дапIнайи дакьатарикан 600 миллион инвесторин хусуси вуйи ва 600 миллионсана буржди гъадагънайи дакьатар ву.
Гъийин йигъаз гьадму дакьатарикан тикилишчивалин ляхнариз 280 миллион харж дапIна ва 7 лихру йишвар гьязур дапIна.
Уьмриз кечирмиш апIу-райи проектдин тикилишчивалин ляхнар 4 йисандин арайиъ вари аьхирихъна духну, яваш-явашди халачйир урхуз хъюгьди.
Гьамусяаьна фабрика дуркьарихъди тямин апIуз белгияйин VanDe Wiele NV компаниейихъди йикьрар йитIура.