Феруза Рамалданова 

Мялимдин йигъан Хив МФЦ-йин улихь «Девриз тялукь шагьрарин гъулай аьтрафар» метлеблу программайин бинайиинди тикмиш гъапIу цIийи сквер ачмиш гъапIну. Шадлугъариъ райондин администрацияйин глава Ярмет Ярметов, Хив ва Агъул районарин прокурор Мажид Велимурадов, администрацияйин вакилар ва райондин актив иштирак гъахьну. 

Хив райондин глава Ярмет Ярметовди чан улхбаъ гъапиганси, улупнайи федеральный метлеблу программа Урусатдин шагьрариъ гьяракатнаъ ади хайлин йисар ву. 

– Хив райондин гъулариъра му программа кечирмиш апIури хайлин йисар ву. Натижайиъ, Дагъустандин саб жерге жара районарихъди сабси, Хив райондизра тялукь шартIар яратмиш апIбаз, агьалйириз эрг’вал йивбаз аьлава йишвар тикмиш апIбаз мумкинвал гъабхьну. Райондин МФЦ, УСЗН, мировой суд, Россельхозбанк ва саб жерге аьлава яшайишдин карханйир сатIи апIурайи му майдан ккабалгуб, дугъриданна, ухьуз варидариз важиблу вухьуз. Гьамус мушвахь йигъну чпин метлебар тамам апIуз гьюкуматдин идарйириз гъафи агьалйириз гъулайди вахт адапIру мумкинвал гъабхьну, – гъапну дугъу. 

Агьалйириз гъулайвалар яратмиш апIури, майдан йишвандин вахтна акварихъди тямин дапIна. Скверин аьтрафар кивнайи чрушнари гюрчег апIура. Агьалйириз дусру йишвар тешкил дапIна. Шид уьмрин бина вуйивал субут апIури, сквер булагъди дабалгна.