Гюльнара Мягьямедова
Улихьна йигъари «Урусатдин юкIв» ччвур тувнайи Вариурусатдин хизандин чирагъ Мягьячгъалайиз гъабхну. Думу чирагъ Москвайиан хьади гъафидар гизаф бицIидар айи Мягьямедялиеварин хизан ву. Чирагъ «Урусат – йиз тарих» тарихи паркдиъ кьабул гъапIну.
Хизандин кIулиъ айи Мягьямедяли УнцIукулин харатчи устйирин тухумдиан ву. Дугъу чав гакIвлин уткан алатар апIури зегьмет зигурайи 35 йисандин тажрубайикан, 27 йис чан уьмрин юлдаш Марьям-Асиятдихъди адаъну.
«Урусат» выставка гъябгъюрайи майдандиъ Вариурусатдин хизандин «Багъридар-ккунидар» форум хъябкьруган, хизандин чирагъдин цIа 12 фанисдик кабхьнийи. Думу фанисар регионариъ Хизандин йис ачмиш апIбан бадали федералин округариз гъахну.
Дагъустан Республикайин зегьметнан ва яшайишдин артмиш’валин министерствойи туврайи мялуматариинди, республикайиъ Хизандин йисан дахилнаъди 100-дилан зиина серенжемар гъахувал планламиш дапIна. План швнуб-саб пайнакан ибарат ву: «Дада-игит» лишан, «Дадавалин машгьурвал» медалар ва орденар айи дадйир кьабул апIувал, Вариурусатдин ва республикайин конкурсар, Хизандин, мюгьюббатнан ва вафалувалин йигъ къайд апIувал, бицIидар айи хизанарин тереф уьбхювалин гъурулуш къайдайиз хувализ бахш дапIнайи серенжемар, бицIидар бабкан шлу яшнан дишагьлийирин сагъламвал уьбхбан, хизандин кьиматлувал за апIбан, культурайин, спортдин, жямяаьтлугъ серенжемар гъахувал.
Мидланра савайи, бицIидар айи хизанариз ихтиярарикан мялуматар тувбан, абйир-бабарихъди ляхин гъабхбан серенжемарра планламиш дапIна.
Февралин 1-пи йигъан Мягьячгъалайиъ Урус театриъ Дагъустандиъ хизандин Йис ачмиш апIбан серенжем кIули гъубшну.
