Зубайдат Шябанова
Июлин 18–19-пи йигъари Табасаран райондин Хючна гъулаъ Кьалухъ Мирзайин ччвурнахъ хъайи спортдин дараматдиъ волейболиан Дагъустандин Кубокдин талитар кIули гъушну.
Талитариъ Каспийск шагьрин, Мягьячгъалайин (ДГУ-йин), Дагъустандин жигьиларин сборный, Табасаран ва Хунзах районарин, Мягьячгъала шагьрин «Меркез» командйир иштирак гъахьну. Думу 6 команда республикайиъ варитIан ужудар гьисаб дапIна.
Волейболин командйирин иштиракчйир, тамашачйир ва спортдиин юкIв али касар Табасаран райондин глава, Дагъустандин волейболин Федерацияйин вице-президент Мягьямед Къурбановди, Дагъустандин волейболин Федерацияйин вице-президент Мягьямад Хайирбеговди, Республикайин клинический больницайин кIулин духтрин заместитель, Табасаран райондин волейболин командайин вакил вафалу гьевескар Себебулла Аьбдуллаевди къаршуламиш гъапIнийи.
Гьар йисанси, ццира талитар РД-йин спортдин ва физический культурайин Министерствойи, РД-йин волейболин Федерацияйи ва Табасаран райондин администрацияйи тешкил гъапIнийи. Спонсорвалин кюмекнак чан пай хусуси метлеб айи дявдин операцияйин иштиракчи Тимур Мутелимовдира кивну.

 
Табасаран райондин волейболин мектебдин директор, райондиъ гъягъру спортдин серенжемарин жавабдар Садикь Уьсманов ич сюгьбатнаъ къайд гъапIганси, Мушваъ Дагъустандин Кубок бадали вуйи турнир гъабхури 5-пи раж ву. Миди район Дагъустандин волейболин цирклиъ улихь хьайиваликан ва спортдиз аьхю фикир туврайиваликан кIура.
«Талитарин сабпи йигъан командйир кьюб дестейиз пай гъапIнийча. Ва талитар гьадму группйириъ айи командйирин чиб-чпин арайиъ гъахьну. Натижайиъ 4 команда гъузну. Табасаран райондин команда Хунзахдин командайихъди, хъа кьюбиб Мягьячгъалайин командйир (ДГУ-йин ва «Меркез») чиб-чпихъди талитназ удучIвну. Полуфиналин талитари тамашачйирик хайлин гьевес капIну. Сабпи полуфиналиъ Хунзахдин команда Табасарандин командайиин гъалиб гъабхьну. Хъа кьюбпи полуфиналиъ маракьлу талитарин натижайиъ «Меркезди» ДГУ-пин спортсменар ккагъну», – ктибтура Садикь Уьсмановди.
Кьюбпи йигъан талитар Кубокдин 3-пи йишвхъан Табасаран райондин ва Мягьячгъалайин ДГУ-йин командйирин арайиъ ккергъну. Табасаран райондин волейболин майдандин эйсйири чпиз къаршуди талит гъабхурайи командайиин рягьятди гъалиб гъахьну ва 2:0 гьисаб ади табасаран командайи шубубпи йишв гъазанмиш гъапIну.
Хъасин турнирин финал ккебгъну. Кьюбиб командйири талит гужалди гъабхурайи. Хунзах райондин команда, 2:1 гьисаб ади улихь гьудубчIвну, 2026-пи йисандин Дагъустандин Кубокдин сагьиб гъахьну. Кьюбпи йишв Мягьячгъала шагьрин «Меркез» командайи гъадабгъну.
«Волейболиан Дагъустандин Кубокдин талитар ихь райондиъ гъахури 5-пи йис ву. Дагъустандин спортдин ва физический культурайин Министерствойиз ва республикайин волейболин Федерацияйиз му важиблу талитар гъахуз ихь район ктабгъувализ чухсагъул пуз ккундузуз. Табасаран райондиъ аьхиримжи вахтна спортдин артмиш’вализ аьхю фикир тувра. Райондин командйири, волейболиъси, республикайин жара талитариъра заан йишвар гъадагъура. Гъадагънайи хъуркьувалариин учу дийигъударча. Республикайин волейболин Федерацияйи гележегдиъра Дагъустандин волейболин Кубокдин талитар ихь райондиъ гъахбанди вуйивалиин инанмиш вуза.
Спортдиъ, икибаштIан, гужлир гъалиб шулу. Хунзахдин спортсменари гъи маракьлу талит улупну. Му лайикьлуди гъазанмиш гъапIу гъалибвал учвуз мубарак апIураза. Мягьячгъалайин командайизра гъадагъу натижйириин дийийигъуб ккун апIураза. Ичв хъуркьувалар улихь хьими. Хъа табасаран команда гъюру талитарихьна гьязур духьну ккунду. Гъюру талитариъ Кубок ихь райондиъ гъубзрувалик миж кивуз ккундузуз», – гъапну Мягьямед Къурбановди, талитарин иштиракчйирихьна илтIикIури.
Гъалибчйирин ва призерарин командйир кубокариинди, медалариинди ва пулин пешкешариинди лишанлу гъапIну. Гъалиб гъахьи командайиз аьлава вуди РД-йин НС-дин депутат, Дагъустандин волейболин Федерацияйин президент Хучбар Хучбаровдин терефнаанра пулин конверт тувну.
Талитариъ судйири ва оргкомитетди варитIан ужудар спортсменарра гъядягъну. Дурар Гьяжи Мягьямадов (Табасаран район), Адам Мягьямедов ва Шамхал Мусаев (Мягьячгъала «Меркез»), Мягьямад Хаирбегов (Хунзах район) вуйи. Тамашачйирин терефнаан вуйи приздин сагьиб Табасаран райондин командайин спортсмен Мурад Юнусов гъахьну.