Зубайдат Шябанова

Республикайиъ апрелин вазли машгьур табасаран шаир Шамил Къазиевдиз бахш вуйи, «Къазиевдин урхбар» литературайин мажлис гъабхувал аьдатнаъ ипна. Думу аьдат гъябгъюрайи, шаирин 80 йисандин юбилей къайд апIурайи йисанра давам гъапIну. Гьаму йигъари Мягьячгъала шагьриан Дагъустандин писателарин союздин аьхю делегация Табасаран райондиз Шамил Къазиевдин гьюрматназ гъабхурайи нубатнан литературайин мажлисдиъ иштирак хьуз гъафну.

 

Литературайин мажлис Дагъу-стандин писателарин союздин табасаран секцияйин кIулиъ айи Сувайнат Кюребеговайи ва РД-йин культурайин лайикьлу гъуллугъчи Арсен Аслановди кIули гъубхнийи.
Табасаран райондин главайин терефнаан дуфнайи хялар райондин культурайин хулаъ муниципалитетдин администрацияйин главайин 1-пи заместитель Рамис Уьсмановди къаршуламиш гъапIну.

«Шамил Къазиев йиз гъулажви ву. Йиз думу сабур айи, гьякьвалин гьиссари юкIв абцIнайи инсанси кIваин илмийиз. Чан кьадарсуз аьхю бажаранвализ дилигди, думу дамагъ кадру, алчагъ’вал, угъраш’вал, кучIал аьгь апIуз даршлу дюзи кас гъахьну. Думу, инсанариз чпин фикрариъна гьяракатариъ марцциди гъузуз кюмек туврайи чан шиърариинди, эсерариинди ихь юкIвариъ гьаммишандиз гъузди», – гъапнийи чан улхбаъ Рамис Уьсмановди.

Шаирин гьюрматназ мани гафар кIури удучIвну гъулхдарин арайиъ Дагъустандин писателарин союздин председатель Марина Аьгьмедова, союздин лезги секцияйин кIулиъ айи Максим Аьлимов, шаирар Аминат Аьбдулманапова, Сувайнат Кюребегова, Шагьвелед Шагьмарданов, Шюшеханум Кери-мова, Аьбдулмажид Къурбанов, Аьлимурад Аьлимурадов, Аьбдусалам Асланов ва жарадар айи.

Му серенжемдиъ Табасаран райондин мектебариъ урхурайидарин арайиъ 1-пи апрелихъанмина гъабхури гъахьи Шамил Къазиевдин шиърар урхбаан вуйи конкурсдин гъалибчйир гьюрматнан грамотйириинди ва пешкешариинди лишанлу гъапIну.
Шамил Къазиевдин шиърариз Арсен Аслановди, Сефьяханум Муртазаевайи ва Рустам Рамазановди мяълийир гъапIну, хъа райондин модельный библиотекайин театрин кружокдин вакилари шаирин «Хъинцамегьмер» ихтилатнаан бицIи сягьна улупну.