Зубайдат Шябанова

 
Табасаран райондиъ спортдин артмиш’вализ аьхю фикир туврайибдикан узу йиз макьалйириъ швнуб-саб ражари мялум гъапIнийза. Дурар гьавайи хабрар дар. Гьаци вуйиб райондиъ саки гьар вазли тешкил апIурайи ва аьхю серенжемарси гъахурайи республикайин дережайин спортдин жюрбежюр талитари субут апIура. Магьа август вазра спортдин талитариинди девлетлуб ва маракьлуб хьибди. Район республикайин дережайин кьюб аьхю талитар гъахуз гьязур шула. Дурар кьюбибра Урусатдин Игитар, ихь ватандашар Рустам Мурадовдин ва Руслан Къурбановдин гьюрматназ бахш дапIнайидар ву. Талитариъ иштирак хьуз хайлин жигьиларин ният а, гьаддиз кьюбиб серенжемарикан улихь ккамиди кьатI’и мялуматар туврача.

Сабпи талит

Августдин 8-пи йигъан Табасаран райондин Хючна гъулаъ, Кьалухъ Мирзайин ччвурнахъ хъайи спортдин дараматдиъ, яшар 17 йисахьнакьан вуйи (2010-2019-пи йисари бабкан гъахьидар) живанарин арайиъ юкьяр дисбаан Урусатдин Игит Руслан Къурбановдин гьюрматназ республикайин турнир кIули гъябгъиди.
Турнирин метлеб юкьяр дисбан спорт артмиш апIуб, агьалйирин арайиъ сагъи уьмрихьна вуйи пропаганда гъабхуб, жигьиларин ва живанарин арайиъ ватанпервервалин тербия гужал апIуб ва гьацира ихь шагьрарин ва районарин спортсменарин арайиъ дуствалин аьлакьйир мюгькам апIуб ву.
Талитар Табасаран райондин администрацияйи ва РД-йин физический культурайинна спортдин Министерствойи сатIиди тешкил апIурайидар ву.

 
Турнирин талитар, яшназ лигну, дестйириз жара апIиди, ва гьарсаб гъагънан котегорияйиан вари халкьарин юкьяр дисбан спортдин къайда уьбхюри гъахиди. Талитариъ иштирак хьуз гъафи спортсмендихь паспорт хьади ккунду. Паспорт хьадарди гъафи спортсменар талитарихьна деетудар. Турнир гвачIинган сяаьт 10:00 ккебгъди.
Иштиракчйирин заявкйир 5-пи августдин сяаьт 17:00-диз кьабул апIура. Вари дестйирин гъагъишнан категорйирин спортсменарин ерцбан серенжемар 7-пи августдиъ йигъандин сяаьт 2-диан сяаьт 5-диз гъягъюру.
Эгер аьлава мялуматар ккундуш, Табасаран райондин бицIидаринна живанарин спортдин 4-пи нумрайин мектебдин директор Мягьямад Исмяиловдин телефондиз зенг дапIну, тялукь суал тувуз шулу: 7 (960) 413-55-83.

Кьюбпи талит

Юкьяр дисбан талитар ккудукIну сакьюдар йигъарилан райондин администрацияйин вакилари республикайин вари шагьрариан ва районариан хиларихъди кчIихбарин (рукопашный бой) талитариъ иштирак хьуз гъюру спортсменар къаршуламиш апIиди. Думу талитар Урусатдин Игит, РФ-дин Яракьлу кьувватарин дявдин гьязурвалин КIулин управлениейин начальник генерал-полковник Рустам Мурадовдин гьюрматназ бахш дапIнайидар ву.

 
Талитар августдин 15-пи йигъан Ургур чвуччвун ва сар чуччун гъалайиин гъахиди.
Му талитарра Табасаран райондин администрацияйи, РД-йин физический культурайин ва спортдин Министерствойи ва РД-йин хиларихъди кчIихбан спортдин Федерацияйи тешкил апIура.
Спортдин серенжем 13 гъагъишнан категорияйиъ яшар 12 йислан зиина вуйи живанарин, жигьиларин ва жиларин арайиъ гъягъиди.
Талитариъ гъалиб гъахьи ва приздин йишвар гъадагъу спортсменар тялукь чIулариинди, медалариинди, дипломариинди ва пулин пешкешариинди лишанлу апIиди.
Талитариъ иштирак хьуз ккунидарихьан заявкйир августдин 14-пи йигъаз исихъ туврайи почтайиз вая телефонариз хътауз шулу:
e-mail: dusshgg@mail.ru, тел.: +7(909) 199-23-30 (Р.А. Махрамов), +7(988) 227-78-88 Т.В. Курбанов.