Зубайдат Шябанова

 
Гьаму йигъари краеведениейиан жигьилариз аьгъювалар туврайидарин арайиъ вари халкьарин VIII конкурсдин натижйир гъивну. Душваъ Табасаран райондин гимназияйин аьгъюваларинна тербияйин цирклиан директорин заместитель, инглис чIалнан мялим ва багъри юрд аьгъю апIбан «Чlиви ирс» кружокдин руководитель Диана Къурбанова гъалиб гъахьну.

Конкурсдин тешкилатчйир

«Ватандин тарих» Урусатдин жямяаьтлугъ фонд ва тешкилат вуйи. Конкурс жигьилариз ватанпервервалин тербия ва жигьиларизна живанариз багъри тарихдикан аьгъювалар туврайи мялимариз кюмек тувбан метлеб ади тешкил гъапIуб вуйи.
Конкурсдиъ уьлкейин швнуб-саб федеральный округдин вакилар иштирак гъахьнийи. Думу шубуб этап ади кIули гъубшнийи. Сабпи заочный этапдиъ иштиракчйири электронный заявка тувну ва чпин проектарикан ктибтну.
Кьюбпи этапра заочный къайдайиинди гъубхнийи. Мушваъ иштирак шулайидари жигьиларихъди ва живанарихъди чпи гъабхурайи ляхникан видеороликар гьязур гъапIну.

 
Заочный этапарин кьяляхъ гьарсаб федеральный округдиан варитIан ужудар шубур иштиракчи гъядягъну ва дурариз Москвайиз аьхиримжи этапдиъ иштирак хьуз теклиф гъапIну.
Финалин пайнаъ иштиракчйири экспертарин советдин вакилар багъри юрд ахтармиш апIбаан чпин тажрубайихъди ва проектарихъди таниш гъапIну.
Жюрийи гъиву натижйириинди Диана Къурбанова Кафари Кавказдин округдин финалистарин арайиъ сарпир гъахьну ва тешкилатчйирин терефнаан вуйи грамотайинна 150 агъзур манатдин премияйин сагьиб гъахьну.
«Табасарандин нурар» газатдин редакцияйин коллективдин терефнаан Диана Къурбанова гъалибвалихъди тебрик апIурача.
Газатдин багахь нумрйирикан сабдиъ Диана Къурбановайин уьмрикан, ляхникан, конкурсдикан макьалайиз ккилигай.