Дагъ. Огни шагьриъ яшамиш шулайи Гюлжигьан Гьяжибеговайи урхурайи халачйириин гьяйран дархьиди гъузуз шулдар. Думу гьацира 6 веледдин дадара ву. Дугъан сар бай ва язна гьамусяаьт Урусатди гъабхурайи хусуси метлеб айи дявдин операцияйин иштиракчйир ву.
Машгьур устадри инсанарин суратар айи халачйир урхура. Гьаци, дугъу Дагъустан Республикайин улихьган кIули гъахьи Владимир Васильевдин, генерал Апти Алаудиновдин ва жара машгьур касарин суратар кайи халачйир дурхна, ва дурар муштарйириз лап кьабулди ву. «Аьдати табасаран кишрайин халачиси дарди, мушваъ гьарсаб гуг алабхъбан чан къайда а. Гъирагъарра, дизигнайи цIарси, дишдар вуди ккунду», – кIура Гюлжигьан Гьяжибеговайи.
Гюльжигьан Гьяжибегова гьацира Дагъ.Огни шагьриъ фунуб вушра жямяаьтлугъ хайир-шейриъ иштирак шула. Думу кечмиш гъахьи дишагьлийирин майит жибкIуз, салам-сумчир айи йишвариъ ипIруб гьязур апIузра гъягъюри шулу, фицики ляхин апIури вердиш гъахьи хиларихьан ляхин дарди саб вахтнара гъузуз шулдар.