Наргиз Гюлечова

29-31-пи октябриъ Каспийск шагьриъ ерлешмиш дубхьнайи Аьли Аьлиевдин ччвурнахъ хъайи спорткомплексдиъ Кьибла Урусатдин халкьарин культурайинна спортдин 17-пи фестиваль ачмиш гъапIну. Думу шадлугънан мярака цци ихь уьлкейиъ къайд апIурайи Халкьарин сабвалин йисаз бахш дапIнайиб вуйи.

Серенжемдиъ республикайин правительствойин председатель Мягьямед Рамазанов, Урусатдин спортдин министрин сарпи заместитель Одес Байсултанов ва хайлин жара хялар иштирак гъахьнийи.

 
Фестивализ Кьибла Урусатдин регионариан 16 спортдин командйир ва 10 культурайин делегацйир дуфнийи. Гьадрарин арайиъ Кабардино-Балкарияйиан, Карачаево-Черкессияйиан, Чечен Республикайиан, Кафари Осетия–Аланияйиан, Адыгеяйиан, Калмыкияйиан, Крымдиан, Севастополиан, Донецкдин ва Луганскдин халкьарин республикйириан, Краснодар ва Ставрополь краяриан, Ростовский, Запорожский ва Херсонский областариан, ва гьацира Дагъустан Республикайиан иштиракчйир айи.
Фестиваль ачмиш апIбан яркьу серенжемдиъ регионариан дуфнайи делегацйири, Дагъустандин артистарихъди сабси, халкьарин аьдатар улупурайи, милли мукьмарикан ва ялхъвнарикан дюзмиш дапIнайи номерарикан ибарат вуйи ужуб культурайин программара гьязур дапIнайи. Думу гьяйран шлу программайихъди спорткомплексдиз уч духьнайи вари инсанар таниш гъахьнийи.
Фестиваль ачмиш апIбан серенжемдиз лигуз кIури агъзрариинди мина уч духьнайидарин улихьна удучIвну, республикайин премьер-министр Мягьямед Рамазанов гъулхнийи. Чан улхбаъ дугъу Халкьарин сабвалин йисан мициб серенжем тешкил апIувалиъ аьхю мяна айиваликан гъапну.

 
«Му фестивали ихь уьлкейин хайлин регионарин халкьар уч дапIну, дурарин культурайин девлетлувал улупура. Урусат гизаф халкьарин игитвалииндина зегьметниинди уч шули, артмиш гъабхьиб ву. Гьарсаб халкьдин чан чIал, культура, аьдатар а. Гьаци вушра, ухьу вари саб тарихди, сар-сарихьна вуйи гьюрматну ва ихь уьлкейин гъюз имбу гележегдихъан вуйи жавабдарвали сатIи апIурахьа», – гъапну Мягьямед Рамазановди.
Чан улхбан аьхириъ дугъу Урусатдин спортдин министерствойиз, Дагъустандин культурайин министерствойиз ва фестиваль тешкил гъапIдариз варидариз чухсагъул гъапнийи, хъа фестивалиъ иштирак шулайи спортдин командйириканна культурайин дестйирикан ужудар натижйир улупуб ккун гъапIнийи.

 
«Дагъустандиз дуфну, му фестивалиъ иштирак хьпан кьяляхъ серенжемдикан вуйи фикрарихъди сабси, му региондин хялар кьабул апIуз ккуниваликан вуйи ужудар фикрарра учвухьди кьяляхъ хьади гъягъбак умуд кивраза», – гъапнийи Мягьямед Рамазановди.
Къайд дапIну ккундуки, Кьибла Урусатдин халкьарин культурайинна спортдин фестиваль 2010-пи йисхъанмина тешкил апIурайиб ву. Хъа думу Дагъустандиъ кIули гъабхури кьюбпи раж ву.

 
Эвелиан фестивалин ччвур «Кавказдин тамшир» вуйи. Думуган дидин иштиракчйир анжагъ Кафари Кавказдин регионартIан дайи. 2021-пи йисхъанмина фестивалиъ Кьибла федеральный округдин регионарра иштирак хьуз хъюгънийи. Гьаддиинди иштирак шулайи 7 региондикан 15 регион гъахьну. Хъа цIиб кьандиси Урусатдин цIийи регионарира чпиз му фестивалиъ иштирак хьуз ккунди айиваликан мялум гъапIнийи.

 
Кьибла Урусатдин халкьарин культурайинна спортдин фестиваль ачмиш апIбан шадлугънан мяракайиъ иштирак шулайи Одес Байсултановди чан улхбаъ гъапиганси, му серенжем хъана яркьу дапIну ккунду. «Гъи, фестиваль ачмиш апIури, гьамциб аьхю мярака кIули дубхна. Серенжем анжагъ Кьибла Урусатдин регионар арайиъ ваъ, федеральный дережайиъди тешкил апIуб лазим ву», – гъапнийи уьлкейин спортдин министрин заместители.
Дагъустан Республикайин олимпийский советдин председатель Къурамягьямед Къурамягьямедовди, Пара-лимпиадайин пешкешнан йишван сагьиб Алиаьсгьяб Рамазановди, Сурдлимпийский тамширарин чемпион Ма-дина Сатушиевайи ва Дагъустандин машгьур артистар Нурианна Каллаевайи, Кристина Рамазановайи ва Денис Федоренкойи спорткомплексдиъ фестивалин пайдагъ за дапIну, гъубхнийи. Думу гъабхбан аьдат, спортдин ва культурайин вакиларин гьунарариз гьюрмат улупбан бадали, тешкил дапIнайиб ву.

 
Гьаддин кьяляхъ боксдиан шубуб ражари дюн’яйин чемпион духьнайи Муслим Гьяжимягьямедовди фестивалин чирагъ кабхьнийи.

30-31-пи октябри фестивалин иштиракчйирин арайиъ спортдин талитар кIули гъушну. Натижайиъ швнуб-саб спортдин жюрйириан Дагъустан Республикайин спортсменар гъалиб духьну, фестивалин гъалибчйир Дагъустандин сатIи вуйи команда гъабхьну. Мягьямед Рамазановди дурариз гъалибвалин кубок тувну.