Зубайдат Шябанова

 
Хусуси метлеб айи дявдин операцияйин иштиракчи, Табасаран райондин Кувагъ гъулан агьали подполковник Бахтияр Аьлимурадов Кьибла военный округдин уьмуми кьушмарин 8-пи армияйин 33-пи мотострелковый полкнан командирди тяйин гъапIну. Тялукь къарарнакк Урусат Федерацияйин оборонайин министр Андрей Белоусовди къул гъизигну.

Гьамусдиз Бахтияр Аьлимурадов 242-пи мотострелковый полкнан командирин заместителди ва штабдин начальникди лихурайи.
Бахтияр Аьлимурадовди 2000-пи йисан Табасаран райондин Гьесхъарин ккергъбан ва 2002-пи йисан СертIларин кьялан мектебар, 2007-пи йисан Дагъустандин гьюкуматдин педагогвалин университет ккудукIну. Университетдиъ айи йисари дугъу военный кафедрайиъра гъурхну. Гьацира Бахтияри 2025-пи йисан РФ-дин яракьлу кьувватарин пияда кьушмарин Уьмуми академия ккудубкIну.

 
Ихь ватандаш Бахтияр Аьлимурадовди военный гъуллугънаъ баркаллу, тажрубалу аьхю рякъ кадапIна. 2008-пи йисан апрель вазли Бахтияри чан хушниинди Урусатдин Федерацияйин оборонайин министерствойихъди контракт гъийибтIну. Думуган ихь эскер Армения Республикайин Гюмри шагьриъ ерлешмиш дубхьнайи 102-пи военный базайин мотострелковый взводдин командирди дерккнийи. 2011-пи йисхъан 2022-пи йисан декабриз Кьибла военный округдин жаради вуйи 20-пи мотострелковый дестейиъ жюрбежюр заан гъуллугъариъ гъахьну. 2022-пи йисан майдихъан 2024-пи йисан декабриз хусуси метлеб айи дявдин операция гъябгъюрайи аьтрафариин Кьибла военный округдин 20-пи мотострелковый девизияйин 255-пи полкнаъ мотострелковый батальондин командирди гъилихну.
Бахтияр Аьлимурадов Кьягьялвалин шубуб ордендиинди, «Игитвализ лигну» медалиинди ва ведомствойин хайлин жара пешкешариинди лишанлу духьна.
Бахтияр Аьлимурадовдиз шубур велед а.

 
«Гьюрматлу Бахтияр Гьяжимурадович, Табасаран райондин администрацияйин коллективдин, райондин депутатарин собраниейин, райондин вари агьалйирин ва йиз терефнаан уву цIийи гъуллугънахъди тебрик апIураза.
Ихь Ватандин игитарин аьдатар уьрхюри, уву намуслуди гъабхурайи ляхниин учу вари дамагълу вуча. Ихь жигьилариз уву лайикьлу намуна вува. Кьягьялвалин шубуб орденди варитIан аьхю гафартIан зади уву гъапIу ляхникан кIура. Хъа яв гьунарарра аьхюдар ву. Увкан нубатнан хъуркьувалар гъадагъбаъ кьан дарапIуб ккун апIураза. ЦIийи гъуллугънаъ лихуз сагъвал ва кьувват тувривуз, увуз ужудар мумкинвалар ва багахь вахтна гъалибвал ккун апIураза!», – гъапну Табасаран райондин глава Мягьямед Къурбановди, Бахтияр Аьлимурадов тебрик апIури.
Яркьуди ихь дирбаш ватанагьлийикан газатдин гъюру нумрйирикан сабдиъ тувдича.