Феруза Рамалданова

 
Хив райондин образованиейин отделин кIулиъ айи Назаряли Тарлановди субут апIурайиганси, 2025-2026-пи урхбан йисандин натижйириз асас вуди, Хив райондин 15 выпускникди «Урхбаъ заан хъуркьувалар гъазанмиш апIбаз лигну» медалариз тялукь агъювалар улупну. Дурарикан 8 кас «гъизилин» ва 7 кас «арсран» сагьибар ву.

 

– Йислан-йисаз хъуркьувалариинди мектеб ккудубкIурайи живанарин кьадар артухъ шулайивалиин ухьу кьадарсуз шад вухьа. Цци Хив райондиъ, 15 кас гъизилин ва арсран медалариз лайикьлу духьна. Дурарикан гьарсар, сифтена сифте халис ватандаш духьну, багъри райондин, Урусатдин дамагъ ва даягъ шлувалик умуд кивурхьа.
Выпускникарин хъуркьуваларикан улхури, саб вуйи имтигьнарин уьмуми натижйириканра дарпиди гъибтуз шулдар. Медалин сагьибар гъахьи выпускникари ЕГЭ тувбакан гъапиш, дурарикан гьарсари чпиз ужудар аьгъювалар айиб улупну.
Пуз ккундузуз, уьмрихьна метлеблуди лигурайи выпускникар йислан йисаз аьгъювалар гъадагъбахьнара жавабдарвалиинди янашмиш шула. Мектебдиъ асас аьгъювалар гъадагъбалан савайи, асас пай выпускникар саб вуйи имтигьнарихьна онлайн жюрейиинди аьлавади ва репетиторарихъди гьязур шула. Му, гьелбетда, такабур ляхин ву. Гъийин девриъ баяр-шубариз заан аьгъювалар гъадагъбаз лазим шараитар вари а, анжагъ дурарин машгъулвал лазим ву.
Къайд апIураза, аьхиримжи йисари 9-пи классдихъан мектебдиъ аьгъювалар гъадагъуб давам апIуз кьаст айи живанар жвуван жавабдарвал гьисс апIурайидар ву. Эгер урхурайирин чан урхбахьна аьшкь адарш, думу гужниинди 11-пи классдиз гьауб дюзиб дар. Амма дицдар дюшюшарра гъузра. Натижайиъ цци райондиъ 9 выпускникдихьан асас имтигьнар тувуз гъабхьундар. Дурари гъюрайи урхбан йисан аьхириъ тазатIан ЕГЭ тувди.

 
9-пи класс ккудубкIурайи урхурайидари ОГЭ тувбакан гъулхиш, мушваъ натижйири рази апIура. Райондиъ «кьюбар» гъахьидар адар.
Аьлава апIурза, йишвариин мялимари чпи гъабхурайи ляхин урхурайидари саб вуйи имтигьнариан ерийин натижйир улупру саягъниинди ккабалгну ккунду. Анжагъ имтигьнар тувуб бес шуладар: заан урхбан заведенйириз гъягъюз шлуси, дурариан баллар гъадагъуб лазим ву. Гьадмуган урхурайидарин аьгъюваларин ерира за хьибди. Мушваъ йишвариин гъудуркьу ужудар пишекар мялимарин кьитвали чан роль уйнанамиш апIура. Гъи вушра учу райондиз информатика, физика, химия, математика, биология, харижи чIалар кивру мялимар кьабул апIуз гьязур вуча.

 
Саб вуйи имтигьнарихьна гьязур шули, мектебариъ кми-кмиди ахтармиш апIбан ляхнар гъахура. Мушваъ аьгъюваларин ери за апIбан бадали, думу улупбарин мониторинг дубхну ккунду. Мялимари гьюрматназ кьиматар за апIували урхурайириз саб жюрейинра хайир тувурдар.
Ерийин аьгъюваларин диб сифте нубатнаъди тербия тувбалан ккебгъра. Му ляхниъ мектебарихьна урхурайидарин абйир-бабарра жалб апIували чан шил гъибтра, – аьлава гъапIну дугъу.
Ухьуз аьгъюганси, уьмриъ варидарикан аьлимар шули аьдат дар. Гъит ихь насларикан халис ватанперверар ишри! Гъит гьарсар жигьилиз яркьу уьмриъ бахтлу гележег кьисмат ибшри! Гъит гьарсариз уьмрин рякъюъ ягъур ибшри!