Гюльнара Мягьямедова
Руш’ватнан месэла лап кюгьне вахтарихъанмина дюн’яйин саки вари уьлкйириъ учIруди дийибгънайи месэлйирикан саб вуди гъубзра. Думу саб вахтналан дубгру, ясана гьял шлу месэла дар. Руш’ватар тувру-гъадагърували гьюкмин вари цирклариъ коррупция арайиз хура. Думу жямяаьтдин артмиш’валихъди гъябгъюрайи, деврихъди цIийи шулайи, ччивар деетнайи гъурулуш вуди ихь уьмриъ убчIвна. Гьюкуматариъ табиаьтдин девлетар, гъуллугъар ва ихтиярар пай апIуб имидикьан гагьди, коррупция терг апIуз хьибдар, фицики инсандин тямягь кьадар айиб дар, хилиъ гъуллугъ, гьюкум айи гизафдари гьадму мумкинвал чан хусуси кисе абцIуз ишлетмиш апIуру. Руш’ватар гъадагъували, инсанди чан хушниинди гъуллугънан ихтиярар за апIували жигьиларин, жямяаьтдин гьякьлу фикрариз чIуруди тясир апIуру.

Гъубшу гьяфтайин аьхириъ РД-йин Главайин вазифйир вахтназди тамам апIурайи Федор Щукинди Дагъустан Республикайиъ коррупцияйиз аьксивал улупбан ляхин албагру Комиссияйин заседание гъубхну. Думу заседаниейиъ гьял гъапIу месэлйир ватандашарин ихтиярар уьрхбаз ва бюджетдин дакьатар мянфяаьтлуди ишлетмиш апIбаз бахш дапIнайидар вуйи.
Федор Щукинди идарйирин кIулиъ айидарикан коррупцияйин гьяракатарихъди вуйи женг ижми апIуб ккун гъапIнийи.
«Агьалйирин яшайиш уьбхбан ва дурар ляхнихъди тямин апIбан цирклариъ, образованиейин ва сагъламвал уьбхбан идарйириъ руш’ватар гъадагъували уьмрин читин аьгьвалатнаъ ахьнайи инсанарин гьял айибтIан читин апIуру.
Хъа коррупцияйи, гизафси яшайишдин цирклариъ, гьюкмин институтарихьна вуйи хъугъвал дубгуз гъитру ва яшайишдин гьякьлувалин бина ккидипуру. Гьаддиз руш’ватар тувбиин ва гъадагъбиин машгъул хьуб къанундиз аькси ляхнар ву», - гъапну дугъу.
Республикайин кIулиъ айирин гафариинди, ахтармишари улупганси, къайдасузвалар гизаф а. Гележегдиъ думу жюре месэлйир арайиз дяргъбан бадали, уьлчмйир кьабул дапIну ккунду.

 
РД-йин гъулан мяишатдин, тикилишчивалин, сагъламвал уьбхбан, мярифатнан министерствйирин кIулиъ айидари чпин идарйириъ коррупцияйихъди женг гъабхбан бадали кьабул дапIнайи уьлчмйирикан мялуматар тувнийи.
Дурарин докладарихъ хъпехъбан кьяляхъ Федор Щукин коррупцияйиин машгъул вуйидари чпин чIуру кьастариъ ишлетмиш апIурайи къанунсуз къайдйириин дийигънийи: лихури адру инсанар гьисабнаъ дерккуб(«мертвые души»), гьюкуматдин контрактариинди мутму гъадабгъруган кьиматар за апIуб ва субсидйир пай апIруган гъуллугъчйири чиб-чпин арайиъ йикьрар йитIуб.
«Коррупцияйихъди аьлакьалу къайдасузвалар ашкар гъахьиган, саризра саб жюрейин кюмек хьибдар. Ихь варидарин улихь дийибгънайи месэла бюджетдин гьарсаб манат мянфяаьтлуди ишлетмиш апIуб ву, руш’ватар дидрисди, гьарсар инсандихьна чаз рубкьру кепег тувуб ву. Гьарсар дагъустанлуйиз ихь республикайиъ къанундиз тялукь вуйи къайда дебккуз хъюгънайиб рябкъюри ккунду», – гъапну республикайин кIулиъ айирин вазифйир вахтназди тамам апIурайири.

Гьелбетда, гъийин йигъаз, шилкьан имдарди, коррупцияйиин гъалиб хьуз дубхьнайи уьлке сабкьан адар, вушра ихь республикайиъ айи аьгьвалат ужуб терефнахъинди дигиш гъабхьнийиш, гизаф инсанар рази хьидийи.