Зубайдат Шябанова
Табасаран райондин Зиль гъул улихьна йигъари гъургъу мархьариан варитIан зарар гъабхьи гъуларикан саб ву. Му гъулан саки вари агьалйир, гъулан рякъяр къайдайиз хубаъ кюмек ккун апIури, швнуб-саб ражари райондин главайихьна илтIикIну. Магьа гьаму йигъари думу гъулан асас кюче «Ерли жягьтлувалар» программайин бинайиинди рас апIуз хъюгъну.

Мидланра гъайри, гьаму программайин кюмекниинди Табасаран райондин Жулжуниф ва Кьулиф гъуларин рякъярра рас дапIну ккудукIура. Му кьюбиб гъуларин рас апIурайи рякъярин уьмуми манзил 4 километр ву. Дурар къайдайиз хуз 15 миллион манат харжар удучIвну.
Зиль гъулан рякъяр рас апIбан аьгьвалат фициб къайдайиъ аш ахтармиш апIури, гьаму йигъари «сельсовет Ерсинский» гъулан поселениейин глава Аьбдулмежид Шябанов ва «Сабвуйи заказчикдин гъуллугъ» (СЕЗ) Муниципалин идарайин кIулиъ айи Аьбдулла Мягьямадов йишв’ина гъушну.

 
Му гъулан Зильский ва Малик Ражабовдин ччвурнахъ хъайи кючйириъ дибдиан рас апIбан ляхнар гъахбан проект РД-йин экономикайин артмиш’валин министерствойин «Ерли жягьтлувалар» конкурсдиз хътапIуб Ерси гъулан жямяаьтдин уьмуми сход айи вахтна гьял гъапIнийи. Конкурсдиъ проект гъалиб гъабхьи вахтна, подрядчик тяйин дапIну, ляхнарихъ хъюгъну. «Ерли жягьтлувалар» программайиинди гъахурайи ляхнарин заказчик «СЕЗ» МКУ ву.
Аьбдулмежид Шяба-новди къайд гъапIганси, думу кьюбиб рякъяр гъуландариз аьхю мяна айидар ва социальный идарйир ерлешмиш духьнайи кючйириантина гъягъюрайидар ву. Думу рякъярин расвалин ляхнариз 13 миллион манаттIан артухъ харжар удучIвуру.

 
«Зильский кючейи кьюб гъул сатIи апIура. Улихьнаси думу рякъ 1,3 километр манзилнаъди рас гъапIну. Гьамус 1,2 километрсана манзилназ думу кючейин рякъ рас дапIну, душв’ин асфальт удубзиди.
Малик Ражабовдин ччвурнахъ хъайи кючейикан улхуруш, думу кюче Ярса гъулан кьялан уьмуми мектебдин дараматдихъан ккебгъну, Зил гъулан кьялаз гъюра. Рякъ иллагьки бицIидариз лазим шулайиб ву. Думу рякъюн 1,1 километр манзилнаъ асфальт улубзуру», – гъапну Аьбдулмежид Шябановди.
Хъа Жулжуниф ва Кьулиф гъулариъ рас дапIну ккудукIурайи рякъярикан «сельсовет Джульжагский» гъулан поселениейин глава Шагьимердан Гьяса-наваевди ктибтнийи. Дугъан гафариинди, Жулжгъарин сельсоветдин гьисабнаъ айи агьалйир сатIиди уч гъахьи вахтна, дурари кьюбиб гъуларин асас кючйир РД-йин экономикайин артмиш’валин Министерствойин «Ерли жягьтлувалар» проектдин конкурсдиъ иштирак хьуз тувбан йикьрар апIуру. Думу жягьлувалиин райондин глава Мягьямед Къурбановра рази гъахьну. Дурари конкурсдин шартIариинди ерли агьалйирикан вая меценатарикан ккун апIурайи пулин кьадар уч апIуру, имбу дакьатар Министерствойи ккеркру.
Жулжуниф ва Кьулиф гъуларин рякъяр кьюбиб гъуларин агьалйириз аьхю мяна айидар ву. Жулжуниф гъулаъ 29 халтIан адаршра, рас дапIнайи рякъ Хючна-Жулжагъ рякъюк кпикьура. Дидин манзил 900 метр ву.
Райондин гъуларин ря-къяр цци ургъури гъахьи гъалин мархьари пуч гъапIну. Табасаран райондин глава Мягьямед Къурбановди гьарсаб дюшюш чан гюзчиваликк уьбхюри, гьарсаб йишв’ина вахтниинди рякъяр къайдайиз хру транспорт ва инсанар гьаъри гъахьну. Дугъан гафариинди, табиаьтди зарар туву рякъярилан гъайри, дурари райондин гъуларин рякъярра къайдайиз духну ккунибдикан гьархрадар. Гьаци «Ерли жягьтлувалар» программайин бинайиинди багарихьди Дарвагъ гъулан рякъра къайдайиз хуз планарик кипна.