Мейлан Нежефов

Халис шаир, жямяаьтлугъ кас Шамил Къазиев бабкан духьну 1-пи апрелиъ 80 йис тамам гъабхьну. Гьяйифки, ватанпервер вахтсузди ихь уьмриан гъагъи уьзри гъухну.
Хив райондин А. Жяфаровдин ччвурнахъ хъайи библиотекайиъ шаирин юбилей яркьуди къайд гъапIну.

Литературайин вечериъ райондин культурайин вакилари ва библиотекайин гъуллугъчйири урхурайидариз шаирин уьмрикан ва яратмиш’валин рякъкан маракьлуди ктибтнийи. Хъа мектебариъ урхурайидари йигъар ккимиди мялимарин кюмекниинди чпи кIваълан дапIнайи шаирин шиърар гъурхнийи ва эсерариан театрин тамашира уйнамиш гъапIнийи. РКДЦ-йин солист Адият Гьямзаевайин шаирин гафариз вуйи мяълийихъди литературайин серенжем аьхирихъна гъафнийи.

Вечериъ иштирак гъахьи мялим ва прозаик Кюребег Мурсаловди дидин гьякьнаан чан фикрар ачухъ гъапIнийи.

«Библиотекайин кIулиъ айи Зумрия Эрзимановнайин регьберваликкди гъи райондиъ гъубху литературайин мяракайиз табасаран халкьдин шаирарин, литературайиин юкIв али ва гьадму цирклиъ лихурайи дустарин терефнаан аферин мялум апIураза. Ав, дугъриданна, Шамил Рамазановичсир шаир табасан халкьдиз хьуб аьхю бахт ва хазна ву. Думу ихь халкьдин литературайин юрккгъин улхьан бисуз жил’ина гьау табиаьтдин шаир ву. Дугъан бикIбариъ саринубдизра ухшар дару чан хусуси хатI а. Узуз, бикIурайи касдиз, думу гьарган нумуна вузуз. Дугъан «Хъинцамегьмер» дурурху кас табасаранарин арайиъ а гъапиш, кучIал шул. Дугъу ихь «Табасаран халкьдин мяълийир» кIури 2010-пи йисан табасаран ва урус чIалариинди адабгъу китаб гъи ихь халкьдиз хазна ву. Чапханайиан удучIву ихь шаирарин варжариинди вуйи китабарин редакторвал дапIнайи Шамил Къазиев гъира табасаран литературайин чирагъ ву гъапиш, узу гъалатI даршул», – гъапнийи Кюребег Мурсаловди.