Гюльнара Мягьямедова

2022-пи йисан Дагъустандин Глава Сергей Меликовди Урус драмайин театрин 100 йисандин юбилей къайд апIбан гьякьнаан Указдиин къул гъизигнийи. Юбилейиз бахш дапIнайи серенжемар цци кIули гъахбанди ву. Дурарикан 20-пи феврали «Дагъустан» РИА-йиъ гъабхьи пресс-конференцияйиъ РД-йин культурайин министр Зарема Бутаевайи ва театрин вакилари ктибтнийи. Дурари хабар тувганси, юбилейин серенжемарин дахилнаъди 27-пи сентябрилан 5-пи октябризкьан «Урус сягьна» ччвур али Вариурусатдин театрин фестивалра гъабхуз кка. Фестивалин вахтна флешмобар, театрин юбилейихьна чапдиан адаънайи китабарин презентацйир кIули гъахиди, республикайин агьалйириз уьлкейин жюрбежюр шагьрариан дуфнайи театрарин артистари спектаклйир улупиди, хъа республикайин артистариз уьлкейин драматический искусствойин устадарин тажрубайихъди таниш хьуз мумкинвал хьибди. 2024-пи йисандин арайиъ Урус драмайин театрин дестейи Москвайиъ, Калининграддиъ, Красноярскдиъ, Тюмендиъ, Ивановойиъ, Калугайиъ, Владикавказдиъ ва жара шагьрариъ спектаклйир улупиди. Хъа юбилейин асас жеренжем 6-пи октябри бинайиин Урус драмайин театриъ кIули гъабхиди.

Урус драмайин театрин директор Тимур Мягьямедовди аьхиримжи 5 йисан театриз гъюру жигьиларин кьадар артухъ шулайиваликан, дурар гизафси классикайин эсерарин дивнайи спектаклийириз хушниинди гъюрайиваликан ктибтнийи. Жигьилариз сягьнайин искусствойин багахь хьуз «Пушкинский картайира» хайлин мумкинвалар тувра. Гъубшу йисан Урус драмайин театри 28 миллион манат гъазанмиш гъапIну. Театри жигьил актерар яшамиш шлу йишвахъди тямин апIузра кюмек тувра.

Зарема Бутаевайи баяр-шубар театрарин искусствойихьна багахь апIбакан улхури, уьлкейин мектебариъ театрар ачмиш апIбан Урусатдин мярифатнан ва культурайин министерствйирин уртахъ проектдиканра ктибтнийи. Республикайин образованиейин ва илимдин министр Ягь’я Бучаевдира му проектдиз чан разивал улупну. Гъи гизаф мектебариъ бицIидарин театрари ляхин апIура.